AZL: Aizawl West III bialtu MLA VL Zaithanzama’n ram veitu mi thahnemngai, mi thiam leh thlir zau tak takte rumna leh au awin ram hruaitute a tiharh zo lo va, hre reng chunga muhil der, ben harh zawh loh an nih avangin an thlak thuai dawn tih a sawi.
Nimina ZPM chhung inkhawmah VL Zaithamzama hian kalphung tharah chuan an hrawn tawh sorkarten sum sem a, mipuite thatchhiat zirtira intodelh an hlat tial tial ang hi an ti ve dawn lo tih sawiin, “Mipuite taimak kan zirtir ve thung dawn a. Mi taima an kang ang a, hnathawhin awmzia a nei dawn a. Mi thatchhia leh pamhamten hmuhsit an hlawh tial tial dawn a, eiru leh kut tling lova sum late kan bitum dawn,” a ti.
VL Zaithanzama chuan, “Ram hnufual leh hmasawn thei lo ram a piangah eirukna a hluar thin an tih angin, kan ram pawh kan hmasawn theih loh dan han thlir hian zep tur a awm lo,” tih sawiin, thenkhat chuan ramin sum an siam a, an hausa thur thur a, ZPM erawh an hmuh chhun chu engzat pawh nise dik takin mipuite chanvo tur an siamsak dawn a. Sawi chhuah hnem leh thawhchhuah hnem aiin an hman dan a dik em tih te, an thiltih chu eng ang taka tangkai nge, mipuiin engtin nge a zar an zo tih hi an ngai pawimawh dawn tih a sawi.
Ram veitu mithiam tak tak, thlir zau leh thahnemngaite au awin awmzia a nei lo tih sawiin VL Zaithanzama chuan, “Hre reng chunga mihil der an nih miau avangin ben harh mai mai chi an ni lo, chutiang mite thlak tur leh mipui mamawh tihlawhtling turin ramin min kohna kan chhang dawn a ni,” a ti bawk.