Formula 1 world champion Max Verstappen chuan kuminah intlansiak vawi riat atang a vawi rukna atan hnehna a chang a. Pathianni zana Canadian Grand Prix-ah pakhatna a hauh.
Montreal a Circuit Gilles Villeneuve a intlansiakah Red Bull driver a chak avangin Red Bull Racing in tun season intlansiak zawng zawngah pakhatna an la hauh vek.
Aston Martin car khalhtu Fernando Alonso chu pahnihna niin Mercedes driver Lewis Hamilton chu pathumna a ni a. Dawhsanah world champion vawi khat aia tam ni tawh vek an ding.
Hnehna a chan avangin Verstappen-a’n Formula One legend Ayrton Senna hnehna chan zat a chang tihna a ni a. Vawi 41 a chakna a ni.
Hei chauh hi nilovin Red Bull Racing in F1 an luh kum 18 na an hmang mek a. Canada a an chak hi hnehna an chan vawi 100-na chiah a ni bawk.
Tun season a car nei tha, tihsual nei duh si lo Verstappen a tlan fal leh viau. Inrinni leh Zirtawpni practice-ah ruahsur mahse Pathianni ah intlansiak a hul. An tlan chhuah atang hma hruai tluanin tibuai pha an awm meuh lo.
Intlansiak zahve vel a tlan laiin kawngsir a sava a su a, a brake a chian loh phah chungin a tawp thlengin an buai lo.
“Ka chak avangin ka lawm. Intlansiak felfai tak angin lang mahse a awlsam lo. A chhan chu kan tyre te a lum hun turah a lum tur angin a lum tha lova, kha khan thil a ti harsa. Vawiin khawvawtin min nghawng bawk a, mahse hetiang chung hian kan chak thei a, vawi 100-na a ni hi a lawmawm hle.” tiin Verstappen chuan a sawi.
A hnungah Alonso leh Hamilton te inum a hmuhnawm a, Hamilton-a’n bul tan tha zawkin pel hmasa zawk mahse an tlan rei hnuah Spanish driver in a elpui hlun a lehpel thei.
British driver dang George Russell-a tan dawhsan beisei ngamna intlansiak a ni dawn niin a lang hman. Nimahsela lap 11-naah a tisual a, bang na taka tauhin a car siam a ngai nasa. Intlansiak chhunzawm leh thei mahse a tlan tluan thei ta chuang lo.
Ferrari ‘risk’ a fuh
Kuminah Italian team in fak aiin sel an hlawh ngun zawk a, driver a nih loh pawhin team in tihsual an nei leh thin.
Tun tumah erawh an che fuh ve thung. Qualifying-ah ruah a sur avangin a vanduai zingah an tang a, pariatna leh 11-na atangin Carlos Sainz leh Charles Leclerc ten bul an tan.
Car pahnihten bul an tan tha ve ve a, nimahsela an hma amite pelh mai an thei bik lo.
An thutlukna siam fuh erawh Russell chetsual vanga safety car tlan laiin car ke an thlak ve duh loh a ni a. Palina leh panganaah Leclerc leh Sainz an awm phah. Medium tyre chu midang aia hmang rei ngamin lap 38 leh 39-naah an thlak chauh a, vawi khat bak intlansiak chhung zawng pitstop an siam lova, a tawp thlengin tuman an lehpelh loh phah.