Aizawl: Mizoram Journalists’ Association President C. Lalrambuatsaiha’n nimin khan Aijal Club-ah Dr. Roluahpuia lehkhabu ziak, ‘Nationalism in the vernacular: State, Tribes and the politics of peace in Northest India’ a tlangzarh a. Pathianinin Zofate hi tum neiin suihkhawm a tum nia a hriat thu a sawi.
C. Lalrambuatsaiha hian British-in Mizote chu ram pathum India, Bangladesh leh Burma-ah te a then hrang nia sawiin hmun hrang hrangah awm mah se Pathianin tum a nei nia a hriat thu a sawi a. “Burma buaina avangte leh Bangladesh buaina avangin mi tam tak an inpui, Mizoramah an rawn tlan lut a. Tun hnaiah Manipur buaina avangin mi tam tak an Jerusalem-ah an rawn lut bawk a, heng mite hi sorkar leh mipuiten duat taka an lo tuamhlawm hian inpumkhatna kawng kan zawh tih a entir niin ka hria a ni,” a ti.
MJA president hian Mizote inpumkhat a pawimawhzia sawiin, “Zohnahthlak zawng zawng hi nuai 30 emaw vel lek kan ni a, hnam dang ngaihtuah chuan kan la tlem hle. Hetih karah inseh neuh neuhte kan awm thin a, hei hi Pathian hian remti lovin kan pumkhat zelna atan kan unaute harsatna tawh hi min hruaikhawm tumna hmanruaah a hmang dawn niin ka hria a ni,” a ti bawk.
Lehkhabu ziaktu, Dr. Roluahpuia chu mi lehkhathiam thei tak a ni tih sawiin C. Lalrambuatsaiha chuan, “Harsatna tam tak patlang leh chumiin a chher hriam a ni a. Hetianga saptawng ngeia lehkhabu a ziak hi a chhuanawm hle a ni,” a ti bawk.