Aizawl: Mizoram Youth Commission Chairman Dr Vanlaltanpuia, MLA chuan nimin khan kumina UPSC prelims exam-a Mizo inziak tling mi 13-te chu MYC Conference Hall-ah thingpui a inpui.
MYC chairman chuan Mizo thalai mi 12 lai UPSC 2023 Prelims-ah an inziak tling thei chu lawmawm a tih thu a sawi a, thalai duhawm tak takten an zinkawng chu hlawhtlinna hmanga a zawh chhuaha zinkawng duhawm tak an neih theih a duhsak thu a sawi.
He huna an tar lan danin MYC Super IAS 2023 Full Sponsorship programme chu kum 2023-2024 chhunga chhunzawm tur a ni a, screening test-a an tih that dan azirin sponsor chhunzawm tur an ni.
Nimin vek khan MYC chairman, MNF Adviser Dr Vanlaltanpuia chuan MNF party chhung inkhawmah thu a sawi a, MYC-in thalai hna zawng laite tan coaching class an kalpui reng a, kum 2018 atanga 2022 inkara MYC coaching atanga zirchhuak mi 141-ten sorkar hna an hmu tawh a, bank-a thawk turin mi 38 an lut tawh tih leh private company leh insurance company ang chi-ah mi 42 an lut tawh tih a sawi.
MYC chairman chuan CIJW Vairengte nen thawhhoa thuthlung an ziah thu te, MYC-in sipaia tang duh an buaipuia coaching an buatsaiha kal zinga mi 70 chu sipaiah an luh tawh thu a sawi a. Sap rama hna thawk turten an paltlang ngei ngai, Occupational English Test an kalpui mek thu te, nurse zirzo tawh mi pakuate chu OET paltlangin sap ramah hnathawk tura an tirh thlak tawh thute a sawi a ni.