Croatia in an ram chanchin a trophy hmasa ber an chawi teuh viau a, nimahsela penalty shootout-ah a vanduai zawkah tangin Spain lakah 5-4 in an tlawm.
Pathianni zanah Rotterdam a Stadion Feijenoord-ah UEFA Nations League final hi khelh a ni a. Hun pangngai leh extra time a goal a luh loh hnuah penalty hmanga chak zawk zawn a ngai.
Spain goalkeeper Unai Simon chuan Bruno Petkovic pet a save sak hnuah right-back Dani Carvajal chuan an chakna penalty a khung.
Spain goal veng hian Lovro Majer pet pawh save bawk mahse Aymaeric Laporte chuan crossbar a pet per ve avangin a chakpui mai thei lo.
Spain hian kum 11 chhunga international trophy an lak hmasak ber a ni a. Spain midfielder Rodri chu man of the match a thlan niin, “Inkhel hautak a ni a, a harsat avang tak hian hnehna kan chang thei hi kan lawm hle.” tiin a sawi.
Inkhel dangah Italy chuan Netherlands lakah 3-2 in hnehna changin pathumna an hauh.
Azzurri tan hian Federico Dimarco, Davide Frattesi leh Federico Chiesa ten goal an khung.