Kartawp liam ta chhung khan United States-ah hmun rukah inpawngkahna thlengin mi paruk an thi a, eng emaw zatin hliam an tuar bawk.
Inkahna hi Chicago dai, Washington, Pennsylvania laili, St Louis, California chhim leh Baltimore-ah a thleng.
Chicago daia lirthei hunna hmuna Pathianni hma taka thil thlengah hian mi 23 kah niin mi pakhat a thi a. A hmunah hian Juneteenth lawmin mi tam tak an punkhawm lai a ni.
Grant county, Washington state-ah Inrinni zan khan rimawi kûtpui hmanga pungkhawm kah niin mi pahnih thiin pahnihin hliam an tuar bawk tih police-in an sawi.
A kaptu nia an hriat hi dan kengkawhtuten Beyond Wonderland electronic dance music festival an hmanna atanga hla vak lovah an kap fuh ve a, an man nghal.
Pennsylvania lailia state police barrack chu silai kengin Inrinni zan khan beiin state trooper pakhat a kap hlum a, pakhat a hliam bawk.
A beitu nia hriat hi truck-in Lewistown barrack-ah zan dar 11:00 velah a inkhalh lut a, calibre rifle lian chiin patrol car a kap a, a tlanchhe zui tih thuneituten Pathianni khan an sawi.
Kum 45 mi, Lt James Wagner-a’n a umzui a, Mifflintown bulah kah veleh niin hliam a tuar a. A hnuah kum 29 mi, Trooper Jacques Rougeau Jr chu Walker khaw bulah patrol car hma lam atangin kah hlum a ni bawk tih thuneituten an sawi.
A hnuah nasa taka inbeihna thlengin a kaptu nia hriat hi kah hlum a ni.
Pathianni zingah khan St Louis chuanhnuai lama pisa pakhatah kum 17 kah hlum niin tleirawl dang pakua an hliam bawk.
St Louis Metropolitan Police Commissioner Robert Tracy chuan thi hi Makao Moore a ni tih a sawi a. Thupuangtu chuan handgun nen tleiawl pakhat man a ni tih a sawi bawk.
Tleirawlte hi intihlima pungkhawm an ni a. An zavai hian kum 15 leh 19 inkar an ni a. Kum 17 mi pakhat, an tlan darhin an chil chuan a hnungzangah hliam a tuar a, a bak mi dang hi silaimu hliam vek an ni.
California chhim lama in pakhata intihlimte kahnaah mi pariatin hliam an tuar bawk.
Los Angeles County Sheriff’s Department chuan kum 16 leh 24 inkar an ni a. Damdawi ina lak niin an zinga pahnih chu an dinhmun a tha vak lo.
Zirtawpni zan khan Baltimore-a inpawngkahnaah mi parukin hliam an tuar.
Officer-ten khawpui hmar lama silai ri an hriat an bawhzui chuan mipa pathum, silaia nasa taka kah hliam an hmu a, damdawi inah lak nghal an ni a; mahse, an nunna atana hlauhawm khawp a ni hlawm lo.
Hliam tuarte hi kum 17 leh 26 inkar an ni tih Baltimore Police Department thupuangtu, Lindsey Eldridge chuan a sawi.