President Joe Biden-a kaihhruai United States sorkar hnuaia ram hruaituten hmun leh hmuna inkawmna an neih hmasa berah China ram hruaitute nen Alaska-ah an inbaihkaih.
Ram pahnihte hi an inbiak ni khatnaah hian ram inrelbawlna kawngah an insawisel tawn ve ve a. Thlalakna hmaah a khât tawkin an inhnial reng.
Chinese Communist Party-a central foreign affairs commission director Jiechi chuan China ram chhung inrelbawlnaa US inrawlh chu an dodal tih a puang a. “A rul tawkin kan thungrul ang, Cold War zia kan hlamchhiah a hun tawh a, hlawkna tel lo ve ve tur tana inbeih reng hi a hun tawh lo,” a ti.
US Secretary of State Anthon Blinken chuan chhang letin, khawvel inrelbawlna muanawm zawk awm thei chu China hian an tikhawlo vek niin a puh thung.
Chinese Foreign Minister Wang Yi chuan US palaiten an tih dan chu demin ‘mikhualte lo dawnsawn dan tur a ni lo’ a ti.
Wang Yi chuan US hian an sipai chakna leh ram hausakna hmangin ram tam tak chu an thuhnuaiah an dah a, national security an tih dante palzamin sumdawnna kawngah duh tawkin hma a la a, China do turin ram thenkhat a fuihpawrh bawk niin a sawi.
An inkawm zawhah Blinken chuan US-in China hmalakna a ngaimawh hrang hrang sawipui chhunzawm an nih tur thu a sawi.
Sawipui an tum zingah hian Xinjiang chungchang te, Uyghur Muslim suatna kawnga an hmalakna te leh Taiwan a zin tuma Hong Kong chungchanga an thil sawihote leh United States cyberattack hmanga beih a nih dan leh an ram thawhpuite sum leh pai dinhmuna chawikan dan turte pawh a tel.