Chelsea chuan France forward Christopher Nkunku chu RB Leipzig atangin Pound maktaduai 52 in an lalut.
Kum 25 mi hian season liamta khan Bundesliga game 25 atangin goal 16 a khung.
France tana vawi 10 inkhel tawh Nkunku hi manager Mauricio Pochettino hnuaia player an lakluh hmasak ber a ni.
Nkunku hian July 1 atangin Chelsea a contract a ziah hi a hmang tan dawn a. A chawr chhuahna club Paris Saint-Germain ah kum li chamin Ligue 1 title vawi thum la in French Cup vawi hnih chawitu team zingah a tel hman. PSG tan hian vawi 78 inkhel hmanin goal 11 a khung a, assist vawi li a nei.
Kum 2019 khan Bundesliga club Leipzig a zawm a. Kum 2021-22 season khan Bundesliga Player of the Season niin German PFA Player of the Season a thlan a ni bawk a. Hemi tum hian league bikah goal 20 khungin midang khung tur vawi 15 a siamsak bawk.
Leipzig-ah hian season li chhungin vawi 172 inkhelin goal 70 a khung bakah assist vawi 56 a nei.
Leipzig-ah hian German Cup vawi hnih a lakpui hman a, tun thla a final an khelhah goal a khung bawk.
“Chelsea ka zawm tur hi ka lawm a, he club ka zawm theihna tur hian nasa takin hma an la. He chona hmachhawn tur hian ka phur a, Chelsea kawr ka ha tur hi ropui ka ti hle.” a ti.
“Ligue 1 leh Bundesliga-ah te ka inkhel tawh a, tunah khawvela league tha ber zing ami Premier League-ah ka khel dawn.” tiin a sawi.