Chhinga Veng Spikers-in Tuichangral beiseina beng hniamin Thawhtanni zanah 3-1-in an hneh a, pahnihnaah inhlangkaiin Tata SK 712 Pro Volleyball League semifinal an lut.
R. Dengthuama Indoor Stadium, Mualpuiah Javed Khan chuan boruak sosang a vaw dai a, 25-23, 25-22, 24-26, 25-22-in Chhinga Veng an chak.
Rajasthan spiker hian point hnuhnung panga zing pathum thawk chhuakin, lehlam lak theih loha a service hnuah inkhel a tawp a, point 35 hmuin 12 hloh mahse phu takin D3 Business Player of the Match-a thlan a ni.
Hmahruaitu TNT laka an tlawmna chhang letin kawng dikah Spikers an kir leh nghal a, vawi li an khelh tawhah point kua hmuin Hunthar an lehpel. Palina Tuichangralin league khelh khat an la nei a, an zawh hunah a sang pali zingah an tel dawn em tih a chiang chauh ang.
Team pahnih tan knockout round luh phak an tumna kawngah chak a pawimawh ve ve a; a tir atangin tu zawk mah fal thei lovin an innih rual chho zel.
Set hmasa berah 23-23 a nih laiin Javed chuan a vaw tla a, Tuichangralin state pawn atanga an lak luh Vinod Khatkar chuan point hloh zui ve thungin net bulah K Lalfakawma’n a ball ben a dang thla.
Set hnihnaah 20-20 thlengin intluk chho leh mah se hun pawimawhah Chhinga Veng an pawng leh a, 23-22-a sang zawk an nih hnuah Javed chuan a vuak leh a service hmangin point a hmu zawn.
Champion lai Durtlang North atanga an lak luh Biakmuana’n vawi 17 vaw tlain point thum a paih a, Javed a thlawp ṭha hle. Samuel VL Nunhlima’n tum li tisual mahse awmze nei thamin point 15 a thawk chhuak a, an khelh hmasak lam aia inkhairualin Spikers an inlan.
Tuichangral tan chet pelh a thiang tawh lo va, Saidingpuia Sailo chuan vawi hnih hlap tla zawnin set lina an tan fuh a, 4-0-in an sang. Mahse, Spikers-in bei letin an lehpel a, set thum la zawn thei turin 20-16-in hma an hruai hman.
Javed chuan line pawnah vaw chhuakin an inkhelh chhung zawnga point ngaa sang zawk a nih theihna hun tha a hloh a; Tuichangralin insang marin Biakmuana vuak an dan tlak hnuah a vawi khat nan set lak theihna hun tha an insiam a, 24-23-in hma an hruai let.
Tlang nghal zo lo mah se vawi hnih an deuce hnuah Chhinga Veng spiker Javed chuan a tisual zawn. Tuichangralin set an lak ve atangin eng emaw chen hma an hruai zui a, chutih rualin point li aia tamin an kalsan thei bik lo.
14-10 a nih hnuah Spikers-in hniam zawk an nihna tizim hret hretin an nih rual chho leh. 20-20 a nih laiin Vinod chuan a vaw tla a, a hnuah service laiin an awmna hmun a dik lo tiin assistant referee-in Chhinga Veng point a paihsak.
Lungawi lo takin an sawisel a, ching fel mai lovin eng emaw chen inkhel chawlh lailawk a nih phah. Thutlukna kal tlangpuiin 22-20-in Tuichangral an sang a, thinrim teuha an khelh zawm hnuah Javed leh Biakmuana’n chiang takin an vaw tla zawn a, Spikers-in nungchang ropui tak an lantir.
An umphak hnuah Javed chuan a service hmangin Chhinga Veng hma a hruaipui a, Tuichangral che buaiin Vinod chuan point a hloh ve leh. 24-22-a hma an hruai let hnuah Javed chuan a hma aia nâin a service a, tu mah tawh lova a tlak rualin point nga an hmu zawn a, league kal mekah a vawi thum nan an chak.
Nikumah thang tlawm takin Chhinga Vengin an tla a, champion lai ni chunga league vawi li an khelhah an tlawm vek. Kuminah insiam thain title thlirin ke an pen a, Zirtawpni zanah league kharin an elpui mek Hunthar nen an intawng ang.
Tuichangral tan Haryana atanga an lak luh Vinod chuan vawi 22 hlap tlain point 12 a hloh a, point 16 hmua vawi ruk tisual Lalhmunmawia nen an intluk tawk viau a, Saitea’n tum 14 vaw tlain point 10 a paih ve thung.
Ningani zanah Tuipuiral hmachhawnin league an khar dawn a, semifinal lut turin Tuichangral an chak ngei ngei a ngai.