Aizawl: All Mizoram CSS Employee Co-ordination Committee huaihawtin CSS hnuaia hnathawkten an dinhmun zirchiangtu, Study Group rawtnate tipuitling tura sorkar kar nan nimin atangin an hnathawhnaah badge dum an bel tran a, ni thum chhung badge dum belh an tum.
Mizoram sorkar hnuaia CSS employee-te hian an dinhmun hniam lutuk chawikan nan sorkar dawrin lungawi lohna tum eng emaw zat an lo lantir tawh thin.
Mizoram sorkarin August 16, 2021 khan an dinhmun zirchiangtu Study Group a din a, study group hian rawtna hrang hrang an siam a, hei hi June 15 hmaa tipuitling turin sorkar an ngen a, hun tiam chhunga sorkarin an duhna a tihhlawhtling loh avangin lungawi lohna lantir nan leh sorkar kar chhunzawm nan nimin atangin badge dum an bel tan a, sorkar atanga thu lawmawm an dawng chhunzawm lo a nih chuan Ningani khian an kal zel dan tur an rel leh dawn a ni.
All Mizoram CSS Employee Co-ordination Committee hruaitute chuan sorkar kar nana badge dum bel an tih hi CSS hnuaia thawkten an zawm tha hle tih an sawi a, nimina lungawi lohna an lantir hnuah sorkar hotute nen inbiakna an la nei lo tih an sawi a ni.