Delhi Police Crime Branch chuan black fungus enkawl nana hman, Liposomal Amphotericin-B injection siam leh hralh kaihhnawiha mi 10 an man zingah doctor pahnih an tel a. Doctor pakhat zawk inah hian damdawi lem bur tê 3,293 an man tel bawk.
Dr Altamas Hussain chuan Delhi chhimthlang lam, Nizamuddin West-a crime branch-in in an dapnaah inchiunaa hman chi damdawi lem hi an hai chhuak tih a sawi.
“Damdawi mansak tam zawk hi black fungus enkawlna atana hman chi inchiuna a ni a. Remdesivir inchiuna chi a awm nual bawk a. Thenkhat hi chu a thih hun thleng tawh a ni,” tiin Monika Bhardwaj, DCP, Crime Branch chuan a sawi.
Police-te chuan an doctor man tel pahnihte medical degree pawh ngun zawkin an chhui zui dawn.
Police hian June 7-a Delhi sorkara Drug Control Department-in damdawi lem inchiuna zawrh a awm tih thu an thehluh an chhuina kal zela man chhuak an ni.
Amphotericin-B hi mucormycosis enkawlna atana hman a ni a. He natna hi mit, hnar, sinus leh thluak thlenga tichhe thei a ni a. Zunthlum leh natna khirh dang neiten an kai hma zual.
Tun hnaiah Covid-19 kai enkawl dama chhuah tawh zingah hetiang natna kai hi ram chhung hmun hrang hrangah an awm.