Manchester United chuan an forward Marcus Rashford chu contract thar rei zawk ziahpui an hnaih.
Rashford hian tun season lo awm turah hian a contract neihlai a kum hnuhnung ber a hmang dawn a. Season liamta khan contract thar chungchangah inbiakna nei tanin inremna an nei hnai a, England forward hi Old Trafford-ah a cham chhunzawm zel dawn niin a lang.
Tun season-ah Rashford hi a chetthat em avangin a contract tharah hian a hlawh tihsan a ni dawn a, club a player hlawh hnem ber zingah a tel tawh dawn.
Kum 25 mi hi Erik ten Hag hnuaiah che tha hle in inelna hrang hrangah goal 30 tun season khan a khung a. Hmun thenkhata sawidanin Ten Hag hi Rashford-a’n United a cham zel a thlan chhan lian tak a ni an ti.
Paris Saint-Germain hian Rashford hi an lo ngaihven tawh thin a, nikum khan lei tumin hma an lo la tawh. Hetihlai hian Manchester City manager Pep Guardiola leh Chelsea boss Mauricio Pochettino te pawh Rashford duhtu zingah tel mahse United a cham chu player duh ber a ni niin an sawi tel.
United hian tun nipuiah striker thar lakluh an tum a, hetihlai hian first team player thahnem tak chu dawrtu mumal tak an awm chuan hralh an phal niin an sawi.