Aizawl: Ni thum chhungin Hachhek Bial Kuhva Chingtu Pawl (HBKCP) leh kuhva chinga eizawngtu mipui duty-ten dan phal loh kuhva ro truck lian phur li an man a, a vaiin quintal 300 vel a ni.
Kawrthah atanga thu dawn danin Thawhtanni zan dar 6 leh 7 inkar khan HBKCP leh kuhva chinga eizawng mipui duty-te chuan Kawrthah leh Rengdil inkar Ramrikawnah kuhva ro quintal 100 chuang an man leh a. Kuhva ro te hi an manna hmunah hlan thlak niin a kang ral nghal vek. Lirthei leh a khalhtu te chungah erawh kutthlak an ni lo.
Kuhva phurtu Hyva-Ashok Leyland (MZ 01K 9510) khalhtu, Lalramthara, Maubawk veng nia insawi hian kg 80 dahna kuhva bag 80 a phur a, Tata (MZ 01S 6800) khalhtu Paumalsawma, Bawngkawn UPC Mual-a khawsa nia inchhal hian bag 70 a phur thung.
Man an nih lai hian kawngpui atanga quarry panna kawng penhleh deuhah dingin, balu phur angin an insawi ve ve a. An kuhva phurh hi ramdang atanga tawlh luh ruk kuhvaah chuan a quality tha ber chi nia sawi a ni. Heng kuhva ro an phurh te hi Maduhi, Chaltlang Lily veng a mi ta niin, a phurtu driver-te hian an sawi a. Champhai atanga kal Aizawla inbanlek (transit)-a la chhawng niin an insawi bawk.
He thil thleng chungchangah hian HBKCP hruaitute chuan dan phal loh thil anih vanga Mamit district chhunga phur lut tawh lo tura khapna thupek a awm reng lai leh tilui tawh lo tura ngenna a siam hlim chhawn laia man tur a la awm cheu hi hriatthiam harsa an tih thu sawiin, “Dan phal loh kuhva tawlhtute hian kuhva chinga eizawngtu mipuite hi min zah lovin min hmusit hle niin kan ngai,” an ti.
HBKCP hruaitute chuan hetiang thil a lo thleng leh a nih pawhin thuchhuah an siam tawh ang khan a titute hian eng harsatna pawh tawk se an cho chhuahah an ngai a, mipui lungawi lo sosang inkhap daih pawh a harsa sawt hle niin an sawi a, “Mipui thinurna avang hian kan duh bak thil a thleng palh ang tih kan hlau tawh a ni,” an ti bawk.
He ti hian ni thum chhungin HBKCP leh Kuhva chinga eizawngtu mipui duty-te chuan dan phal loh kuhva ro truck lian phur li an man ta a, a vaiin quintal 300 vel a ni.
Hetiang hi thil awmdan a nih avangin HBKCP leh Taitesena Group YMA te chuan a remchang hmasa berah Joint meeting neih an tum niin thudawn a ni.