Aizawl : Ministry of Tribal Affairs-in article 275 (I) hnuaia grant a pek hmanga sikul sak that tur Govt. Tuikual North Middle School leh Vaivakawn High School te chu nimin khan bialtu MLA, Minister ni bawk Lalruatkima’n a tlawh. Aizawl Deputy Mayor R. Thanglura leh School Education department hotute leh khawtlang hruaitu te bakah sikul enkawltute nen sikul sak that dan tur an sawiho.
Lalruatkima chuan a biala sikul pahnih sak that a ni tur chu lawmawm a tih thu leh pawisa awm te tangkai taka hman ngei a nih a beisei thu a sawi a. Hna tha, tlo leh mawi a awm theih nan khawtlang hruaitute leh sikul thuneitute thawhpuina a ngen.
Leilung malsawmna fur ruahtui Mizoramin a dawn te khawl khawm a tul thu pawh Lalruatkima chuan sawiin, sikul sak thatna turah pawh fur ruahtui khawl (rain water harvesting) ngaihpawimawh ni se a duh thu a sawi.