Auckland, New Zealand-a Chinese thingpui dawrah Thawhtanni zana zanriah ei laite mipa pakhatin hretin mi a chek a, paliin hliam an tuar.
Thlalak leh video darhah chuan thingpui dawr pakhat atang hian mi an tlanchhe hum hum lai hmuh tur a awm a. Thil thleng hmutute chuan mi pakhat lutin a lo awmte chu hreiin a chek ta mai niin an sawi a, zan dar 9:00 (India-a chhun dar 1:30) vela thleng niin an sawi.
Tual chhung chanchinbute hnenah a chektu nia an sawi hian hmanraw dang, ‘tuboh lam chi’ pawh a keng tel nual niin an sawi bawk.
He thil thlengah hian a hmunah Chinese pakhat man nghal a nih thu police-in an sawi.
Mi chunga rawng taka che thubuai siamsak a ni a, a hming leh a kum zat erawh engmah an sawi lo thung.
Police chuan he inbeihna hi chi leh chi inkara buaina avanga thleng a nih loh thu leh pawikhawihna pangngai anga thil an kalpui thu an sawi.
Damdawi inah mi pathum an la awm a, an dinhmun pawh a tha vak lo niin an sawi bawk.
Khawpui dai deuh, zanriah eina atana hman lar tak hmun, Albany-ah thil thleng a awm tih an hriat veleh police hi an tlan nghal a. Mi beihna thlenna hi Zhangliang Malatang, Yues Dumpling Kitchen leh Maya Hotpot thingpui dawr te niin an sawi.
Dawr pakhata thawktu chuan engmah inrin hmanna pawh awm lovin mi pakhat a lut thut a, ‘hrei lam ang chi hmanrua’ phawrhin dawhkan lo kilte chu a bei ta nghal mai niin a sawi a. Ei siamtu, chef pawhin a chetna hnuhma chu ‘indona hmun ang mai’ a nih thu a sawi bawk.
“Mipa la naupang tak tak, kum 20 bawr chho vel chu an lu thi hnuangin ka hmu a. Reilo te an ding a, an tlu zui ta a ni,” tiin Radio New Zealand (RNZ) hnenah a sawi.
Zanriah ei zinga pakhat chuan Newshub-a AM Show hnenah mipa pakhat a hmuh chuan ‘tuboh ang tak lian tak’ la chhuakin ‘a vai kual fua fua’ niin a sawi.
Hmeichhe dang pakhat pawhinzanriah a eipui a thiannu chu hnung lam atangin hrei hian beih a ni tih RNZ a hrilh bawk.
Mi dangin, “Engnge i tih, engvangin nge khatia i tih ngawt?” tiin a au chhuak a, chumi hnuah a thiannu chu a chek nawn leh niin a sawi bawk.
Police chuan hetianga a tih chhan hi an sawi lo va; mahse, thu zawta chhuiin thubuai dang an siamsak ngei dawn tih erawh an sawi.