Atlantic Ocean-a Titanic pil ta en tuma tuihnuailawng (submersible), Titan chu a chin hriat loh mek a ni a. He lawngah hian mi langsar leh hausa tak tak pawh an chuang tih hriat a ni.
Submersible operator OceanGate chuan an lawng leh a chuangte chu hmuh kir leh ngei tumin an bei mek tih a sawi.
OceanGate chief executive Stockton Rush chuan an ngawrh taka an zawn mek zel thu a sawi.
Sub tê chi hi Pathianni khan Atlantic tuipui lailia a chhuah hnu darkar khat leh minute 45 vel atangin a biakpawh theih loh a ni.
Search team-in theihtawp an chhuah mek zel a; mahse, hun a liam chak si a, a chuangte hima hmuh beiseina a tlem tan a, tun thlengin hnuhma an la hmu lo bawk.
Sipai thlawhna, tuihnuailawng leh sonar buoy hmangin a zawn hna hi thawh mek zel a la ni.
Titanic lawng keh hi St John’s, Newfoundland chhim lam km 700km vela hlaa awm niin sub bo mek zawn hna erawh Boston, Massachusetts atang pawha thawh a ni.
US Coast Guard chuan Thawhtanni tlai atang khan research ship, Polar Prince an tih chu tui pawnlang china zawn nan an thawh chhuahpui tan.
Tuihnuailawng tê chi bo mek hi khualzinten hman lai lawng lian pil ta an en theih nana man chawia an chuanna a ni.
Ni riat chhung tui chhunga a zin chhung hian Titanic pil ta ruangruh chu an enin an thlir thei a, a chuan man hi mi pakhat tan $2,50,000 zel niin St John’s atanga chhuak an ni.
Lawng lian zawk hmangin khawmual atanga km 595 vel, lawng pilna chung zawn vel thleng an kal phawt a, Titanic awmna takah hian truck tiat vel tuihnuailawng tê chi, Titan hmangin an lut a ni.
Titan-ah hian mi panga an chuang thei a, darkar 96 chhung daih ‘life support’ a awm niin an firm website-ah tar lan a ni.
Titanic lawng lian hi Atlantic mawng metre 3,800-a thukah a awm a. Newfoundland vaukam atangin km 600 chuanga hla a ni.
Mihring phur lawng, a hun laia lian ber hi a vawi khat nana a zin chhuah, Southampton atanga New York a pan laiin kum 1912 khan a pil a. Passenger leh thawktu 2,200 vel chuangin mi 1,500 chuang an thi a ni.
Tun tuma sub bo mekah hian British adventurer Hamish Harding leh UK-a sumdawng lian leh a fapa pawh an chuang nia hriat a ni.
Kum 58 mi, Harding-a hi aircraft firm Action Aviation chairman ni lainiin ram la daidar loh daidar nuam ti mi niin Guinness World Records pawh pathum lai siamtu a ni.
Pakistani sumdawng, Shahzada Dawood leh a fapa, Suleman te pawh an tel nia hriat an ni a, an chhungte chuan tawngtaipui tura ngenna an siam.
French explorer Paul-Henry Nargeolet pawh a tel nia hriat a ni a. Facebook-ah Harding-a hian an chhuah hma lawka thlalak a dahah a lang ve a ni.