Congress hruaitu, Priyanka Gandhi chuan Assam-a BJP kaihhruai sorkar chuan hna nei lo a titam hle tih a sawi.
Gandhi-i hian tun hnai khan ni hnih châmin Assam a tlawh a, state leh sorkar laipuia BJP sorkar chu hna nei lo tam phah chhan tia sawiin nasa takin a bei.
“Assam-ah hian graduate chin paruk zela pakhat hi hna nei lo an ni a, postgraduate chin 10 zela pakhat hian an nei lo bawk,” a ti.
Gandhi-i chuan sorkar chuan hna nei lote hna pe turin sorkar department hrang hranga hmun ruak awmte chu state sorkarin a hnawh khat duh lo niin a sawi bawk.
“Department hrang hrangah post ruak nuai thum chuang a awm a, sorkar hian heng hmun ruakte hi a hnawh khat thei reng a; mahse, hnawh khah a tum miau si lo a ni,” tiin Gandhi chuan a sawi a. Hei hian hna nei thei tam tak hna nei lovin an awm phah niin a sawi bawk.
Gandhi chuan Assam-a BJP kaihhruai sorkar chuan sector tam takte mi mal kutah a dah niin a sawi a. Hei hi mi hausa thenkhatte vulh lenna mai a nih thu leh mi retheite chawi kanna lam pakhat mah a hawi lo niin a sawi bawk.
Assam-a BJP-AGP tangrual pawh Gandhi-i chuan na taka beiin, “AGP hi tunah chuan ‘Asom Gana Parishad’ pawh an ni thei tawh lo va, ‘Dilli Gana Parishad’ an ni tawh zawk,” a ti.
“Asom Gana Parishad hi tunah chuan Dilli Gana Parishad-ah an inlet tawh a. Saipui kha tunah chuan bhigi billi (zawhte) chauh an ni tawh a ni,” tin Gandhi chuan a sawi.