Aizawl: Health Minister Dr R. Lalthangliana chuan nimin zing khan Aizawl chhuah lama Manipur atanga raltlante enkawlna hmun hrang hrang a tlawh a. Raltlante enkawlna hmun tlawhnaah mamawh zuala an hman turin Rs 5,000 theuh a hlan.
Raltlante enkawlna hmun hrang hrang a tlawhnaah Dr R Lalthangliana hian, “Kan unaute sahimna zawnga rawn tlanchhiate hi Mizoram sorkar leh Mizoram mipuiten kan thlahthlam ngai dawn lo va, kan tih theih chin chinah kan tang reng ang,” tiin, raltlante hriselna uluk taka vil reng turin hma an lak reng thu leh zirna kawnga an bahlah loh nan ruahmanna an siam mek thu a sawi.
Dr R Lalthangliana hian Thuampui YMA Hall-a raltlan awm mekte tlawh hmasa berin, YMA leh local council hotuten an lo dawngsawng a. |huampui YMA Hall-ah hian chhungkaw 20 awmin an vaiin mi 66 an ni a, naupang 20 an awm bawk. An zingah hian leader inruatin eirawng an inbawl thin.
Hemi hnu hian Tuirial Airfield-a raltlante enkawlna hmun Osborne Moral Reformation Centre tlawh lehin, raltlante enkawltu Tuirial YMA hruaituten an lo dawngsawng a. Turialah hian raltlan 115 awmin, chhungkaw 29 an ni a, naupang 70 an awm a, an zinga naupang pasarih chu primary school hnaivaiah luh tir an ni.
Tuirial-a raltlan awm te hi ei rawng an in bawl chawp a, tui lamah harsatna an tawh avangin anmahni sum sengin tui an lei thin a, an zinga hna thawk thei mi 10 bawr vel hian inhlawhna zawngin an chhuak thin a. Fur khua a hnawng nen thosi a tam avangin thosilen an mamawh thu minister hnenah an lo thlen.
Minister hian Beraw tlanga Art & Culture Multipurpose Complex-a raltlante kawm bawkin, hetah hian mi 71 awmin an harsatnate an lo thlen a. Hemi zawh hian Beraw Convention Centre a raltlan hnuchham awmte a tlawh leh a, helai hmunah hian DMM Children’s Home, Churachanpur-a hnuchham naupang 28 leh anmahni enkawltu mi panga an awm a ni.
DMM Children’s Home enkawltute chuan rinnaa Home enkawl an nih thu leh tumah behchhan an nih loh avangin harsatna an tawk tih an sawi a, Churachanpur-a an Home awmna chu mi ram an luah hawh a nih avangin a neitute’n lak let an duh tawh avangin haw leh pawh ni se harsatna an tawk dawn tih an sawi.
Dr R Lalthangliana hian Central YMA office tlawhin, Transit Camp a tlawh nghal a, Central YMA hotute nen inkawmin hmalakna tur pawimawh hmasate an sawi ho a. Minister hian a tul apianga an hman atan Rs 10,000 a hlan bawk.