Tamil Nadu-a Virudhnagar district, Sivakasi khuaah nimin chawhma lam khan a ruka halpuah/halmawi siamnaah thil puak thei na taka a puah avangin mi pathum an thi a, mi dang pahnih na takin an inhliam.
Chhiatna thlenna hmunah hian chhanchhuah leh thil chhia senghawi hna thawh nghal mek a ni.
Sivakasi khua hi India ram halpuah siam chhuahna khawpui ti hiala hriat niin chhiatnana pawh a thleng fo thin.
Kumin February thla khan halpuah/halmawi siam chhuahna hmuna kangmei chhuakah mi 12 an thi a, mi dang 36-in na takin hliam an tuar.
An thil siam chhuah thin avanga mini-Japan tia hming lem an vuah, Sivakasi khua hian India rama halmawi/halpuah siam chhuah zawng zawng 90% vel an tum a. Ei zawnna atana hmang pawh tamin mi 8,00,000 vel a chawm mek a.
Kum tinin Virudhunagar district-in a sum lakluh chu Rs. Vaibelchhe 2,000 vel a tling hial.
Nimin tuk vek khan West Delhi-a pheikhawk chhekkhawlna hmunah kangmei nasa tak a chhuak bawk a. Chin hriat lovin mi paruk an awm.
Zing dar 8:22 vel khan fire department chuan kangmei chhuak vanga kohna an dawng a, a hmunah hian kangthelh motor 24 an tlankhawm nghal a ni.
West Delhi-a Udyog Nagar-a pheikhawk dahkhawmna hmun, Apeksha International kumdama kangmei chhuakah hian kangthelh motor a thlen khawm hnuah a dang 15 koh belh hial an ni a. Ambulance pahnih a thawk chhuak bawk.
Kangmei chhuah hnuah hian chin hriat lovin mi paruk an awm a. Inhliam an awm zat chiah erawh hriat a la ni lo.