India ram tana Japan-a palai, Sanjay Verma chuan Myanmar rama sipai roreltute leh mipui aiawhte chu an bepawp reng niin a sawi a, sipaite pawh an rama buaina a punlun lohna tura hma la turin an chah niin a sawi.
Verma chuan, “Myanmar ramah sipaite leh mipui lamte chu dan pangngai leh pangngai lo deuhte pawhin kan be reng a. Sipai hotute hnenah politics vanga February 1 hnua mante chu chhuah zalen tura ngenna leh tuna an ram awm dan chingfel turin puih kan inhuam reng tih kan hrilh,” tiin a sawi.
India chuan Myanmar ramin hma a sawn theihna tura ASEAN-in inkaihhruaina a duante chu a thlawp a. Mipui cheng puihna tur leh buaina tihtawpna turin inkaihhruaina panga zawm tur an duang a ni.
“Myanmar ram hi hrem ve ngawt kan tum lo a. An rama remna leh muanna a awm theihna turin puih theihna apiangah kan inpeih reng a. Ram dangte nena inzawm khawmin rah tha an seng theihna tur pawhin an harsatna sutkian hi kan inpeih reng,” tiin a sawi bawk.
Japan rama foreign correspondent club-a zawhna an zawhnaah Verma hian Myanmar ramin sipai rorelnaa an luh hmasak zawk tum khan mipui rorelna an neih theihna turin nasa takin India chuan hma a lo la tawh thin a, tun tumah pawh hian hma la turin a inpeih reng niin a sawi.