Pathianni zankhuaa Kashmir hmar lam, Sapore khuaa venhim hna thawktuten beihpui an thlaknaah Lashkar firfiak pawla commander pathum an kap hlum a, an zingah hian Pakistani pakhat, Abdullah, Asrar tia hriat bawk chu a tel tih nimin khan police-ten an puang.
Police chuan Asrar-a hi Sapore-a cheng pahnih, Mudasir Pandit leh Khursheed Mir te nen kah hlum an nih thu an sawi a. An vai hian Jammu & Kashmir-a councillor, sarpanch leh pawisawi lo eng emaw zat thahnaa inhnamhnawih an nih thu an sawi.
Jammu & Kashmir Director General of Police Dilbagh Singh chuan Mudasir Pandit leh ram dang mi, a kawmngeih tak, Asrar-a te lakah hian thubuai 18 ziah luh tawh a nih thu leh pakhat dang, Khursheed Mir hi thubuai paruk nei lai a nih thu a sawi bawk.
Kashmir police chief (IG) Vijay Kumar pawhin, “Pandit hi police-in an chhinchhiah dan chuan buaina hrang hrangah inrawlhin police pathum, councillor pahnih leh civil mi pahnih thattu a ni,” a ti.
Pathianni zanah khan venhim hna thawktute hian an thu dawna Sapore-a Tantraypora Brath-a in pakhatah hel an awm tih an hriat chu an bawhzui a. “Beihpui thlak hi police lal leh army officer-ten uapin hel pawla commander lawk pathum hi in chhungah thah an ni,” tiin DGP Dilbagh Singh chuan a sawi.
Beihpui thlaknaah hian sipai pakhatin hliam a tuar.
An mi thahte lo ken AK 47 rifle pahnih leh AK 56 rifle an chhuhsak. 9 mm pistol, 77 AK mu, 21 pistol mu, AK magazine pakua, pistol magazine pathum, hand grenade, ammunition pouche pathum leh matrix sheet pahnih an lo kawl bawk.