Aizawl : Minister R. Lalthangliana nimin khan Aizawl chhuahlama Manipur buai avanga Mizoram beltu Zofate awmna hmun hrang hrang a tlawh a. Health & Family Welfare Board Vice Chairman ZR Thiamsanga bakah Indian Medical Association, Indian Dental Association leh Mizoram Government Doctors’ Association leh CYMA aiawh ten an tawiawm bawk.
R Lalthangliana chuan Thuampui YMA hall-a awm mek te tlawh hmasaberin, YMA hruaiotute leh Local Council hotu ten lo dawngsawngin, an dinhmun te an lo hrilh a. Thuampui YMA hall-ah hian chhungkaw 20 awmin, an vaiin mi 66 an ni a, naupang 20 an awm bawk a ni.
Tuirial Airfield-a Osborne Moral Reformation Centre-a awm te tlawh lehin, Tuirial YMA hruaitu ten an lo dawngsawng a. Turialah hian mi 115 awmin, chhungkaw 29 an ni a, naupang 70 an awm a, an zinga naupang 7 chu primary school hnaivaiah luhtir an ni.
Tui lamah harsatna an tawh avangin anmahni sum sengin tui an lei thin a, an zinga hnathawk thei mi 10 vel chu inhlawhna zawngin an chhuak thin. Fur khua a hnawng nen thosi atam avangin thosilen an mamawh thu Minister hnenah hian an lo thlen bawk.
Beraw tlanga Art & Culture Multipurpose Complex-a awm te pawh tlawhin, mi 71 awmin, an harsatna te Minister hnenah hian an lo thlen a. Beraw Convention Centre-a Manipur lama hnuchham awmte pawh tlawhin, Zemabawk YMA leh Local Council hruaitu ten an lo dawngsawng a. Convention Centre-ah hian DMM Children’s Home, Churachanpur a hnuchham naupang 28 leh anmahni enkawltu mi 5 an awm.
DMM Children’s Home enkawltute chuan rinna a Home enkawl an nih thu leh tumah behchhan an nih loh avangin harsatna an tawk tih an lo hrilh a. Churachanpur-a an Home awmna chu mi ram an luah hawh a nih avangin a neitu ten laklet an duh tawh thu leh haw leh pawh ni se harsatna an tawh tur thu an sawi.
Minister R Lalthangliana chuan hmun hrang hranga awm te chu mamawh zual leina tur Rs 5,000 theuh a pe a. Harsatna leh mamawh an neih a hnena an lo thlen te chu a theih anga a bawhzui tur thu sawiin, zirlai te zirna an chhunzawm tir theih rih lohna chhan ber nia an sawi chu tuna an awmna hmun ah an awm reng dawn lova an hriat avang leh an awmna tur mumal ruahman a la nih loh vangin an la hlauthawng deuh tih an sawi.
R Lalthangliana chuan Central YMA office-a Transit Camp pawh tlawhin, CYMA hruaitute nen an inkawm a. A tul apianga an hman atan Rs. 10,000 a pe bawk.