Aizawl: Mizoram Legislative Assembly kum 50 tlin lawmna chu kum khat chhung neih a nih hnuah nimin khan a kharna hun hman a ni.
Jubilee lawmna kharna inkhawma thusawitu, Deputy Chief Minister Tawnluia chuan Mizoram Legislative Assembly chu zahawm leh entawntlak taka rorelna hmun leh sawihona hmun ni fo thin a nih thu leh state dangte nen khaikhinin a felfaiin boruak a tha thin hle a, anmahni thlang tlingtute zahawmna an hum hle tih a sawi a, tuna Assembly nihphung leh state dangte laka Mizoram tihmingthatu member-te inthunun theihna leh dawhtheihna chu chhawm nun zel a nih theih nan duhsakna a hlan.
Assembly Speaker Lalrinliana Sailo pawhin thu sawiin, MLA lo ni tawhte leh ni mekte thawhhona a tha hle tih te, assembly secretariat-a thawktu zawng zawngte inpekna te chu lawmawm a tih thu a sawi a, Mizoram politics chu Mizo Mizona leh Kristiannain a kaihhruai thin thu sawiin, “Tawngkam pawh an uluk tlang hle thin,” a ti.
Speaker chuan hruaitu hmasate leh dan siam tura thlan tlin MLA-te chhe lailet der leh thil tha tih reng reng nei lo anga sawi thin chu pawi a tih thu sawiin, kum 1972 atanga vawiin thlenga MLA lo ni tawh zawng zawng chu mi 232 an nih thu leh ram tana thawk tha leh sulhnu ropui tak tak neite vek an nih thu a sawi.
Jubilee lawmna kharna inkhawmah hian Deputy Speaker H Biakzauva, Minister Dr. R. Lalthangliana leh FLAM President Liansuama ten thu an sawi bawk a ni.
Mizoram Legislative Assembly kum 50 tlin lawmna hi nikum March thla tir lam atang khan neih tan a ni a, jubilee theme atan ‘Dikna, Inpumkhatna leh Hmasawnna’ tih a ni a, kum khat chhungin kawng hrang hranga lawm a ni a, a lawmna pui ber chu May 9-10, 2022 khan neih a ni.