Tesla CEO Elon Musk chuan an electric car siamtute chu India-ah ‘a hma thei ang bera inbun’ ve an tum thu a sawi.
Musk-a hian US tlawha zin mek, Indian Prime Minister Narendra Modi-a nen an inkawm hnuah he thu hi a sawi a ni.
Indian sorkar hian Musk-a hi a electric lirthei siamte bakah vansang lama a sumdawnnate an rama huang zauh tura remchang a siamsak a ni.
Musk chuan hian India-a inbun turin ‘hun tha lai ber’ a dap tih sawi.
Modi-a hi Twitter pawh neitu, Musk-a nen an inkawm hi Twitter, dintu pakhat zawk, Jack Dorsey-a’n India-in thawk khat lai khan an platform-a awmte an duh loh avangin titawp turin hma an la tih a sawi tuk lawkah a ni.
Dorsey-a hian chanchinthar puangtu pakhatin an kawmnaah he thu hi a sawi a, Indian sorkar erawh chuan phain, ‘dawt chiang tak’ tiin a sawi.
Musk-a hian Nilaini khan Dorsey thu sawi hi sawi zui vein tual chhung sorkarin a ti a nih chuan Twitter chuan duhthlan tur an nei lo tih a sawi a, ‘kan tihtawp mai a ngai a ni mai’ a ti.
“Dan hnuaiah zalen taka miin thil an sawi theihna turin theihtawp kan chhuah a ni,” a ti bawk.
Musk-a hian Modi-a fan pakhat a nih thu pawh a sawi a, India hian ‘khawvel ram lian tak tak dang aiin theihna a ngah zawk’ tih a sawi bawk.
“Modi-a hian India hi a ngaihtuah tak zet a, India-a investment tih theihna tur a dap nasa hle a. Hun tha ber lai kan dap a ni,” tiin thuthar lakhawmtute hnenah a sawi a. “Tesla hi India-ah hian a awm ngei ang,” a ti.
Modi-a hian Thawhlehni khan New York a thleng a, US-ah hian ni thum a cham dawn a, India leh US inkungkaihna thil hrang hrang a buaipui dawn a ni.
Ningani hian White House-ah amah lawmna inkhawm a awm dawn a, a hnuah President Joe Biden nen an inkawm ang.
Thawhlehni khan US lawmaker 70 chuan Biden-a hnenah lehkha thawnin mihring dikna chanvo palzut chungchanga India-a thil thlengte chu Modi-a sawipui ngei turin an ti a. Sakhuana thila intihduhdahna, chanchinbu zalenna leh vantlang huap pawlte sorkarin a bei thin te chu an ngaimawh tih an sawi a ni.