Nagaland Chief Minister Neiphiu Rio chuan Nilaini khan Noklak chu an state-a district 12-na atan vantlag khelmualah a hawng.
Rio chuan an district thar chu ‘Frontier district’ tia sawiin Myanmar nena an inrina hmatawnga awm a nih thu a sawi.
District thar hawnnaah hian Vice President Venkaiah Naidu-an Noklak district thar hawn chungchanga video a siam pawh chhuah niin district thangduang tak ni turin duhsakna a hlan.
District thar hawn rual hian Khaozaosie-Hok-Ah festival chu Rio hian a hawng nghal bawk a. District thar hawn chu sorkarin kawng tinrenga hmasawnna a awm theih nana thawhhona thatzia lanna a nih thu chief minister chuan a sawi.
District thar cheng mipuite duhsakna a hlan a, anmahni kea din ngei tuma mi dangte elna rilru pu turin a chah bawk.
Rio hian district thar chhunga cheng thalaiten tun lai thiamna nena tangkawpa lo neihna lam an buaipui chu lawmawm a tih thu a sawi bawk.
Khiamniungan hnamte chu Khaozaosie-Hok-Ah festival an hman mek chibai bukin an tan kum duhawm tak intanna ni turin duhsakna a hlan nghal.
Chief minister hian COVID-19 danna pek mek chungchang pawh sawiin, damdawi ina thawk leh ral hmatawnga thawkte bakah kum upa, kum 50 chung lam chu ngaih pawimawh hmasak an ni tih a sawi.
Nagaland Deputy Chief Minister Y. Patton pawh he hunah hian telin district mipuite chu inhmangaihna nen, an thenawm district pawh kawmngeih turin a chah a. An district chu India tan khawchhak luhkapui pawimawh a nih thu a sawi bawk.