Aizawl: Aizawl South III bialtu MLA Prof F Lalnunmawia chuan a bial chhung Melthum leh Hlimen veng atanga kumin HSLC leh HSSLC pass te lawmpuina hun a hman pui.
Thawhlehni zan Melthum Vantlang In leh Hlimen Presbyterian Kohhran hall-a lawmpuina hun neihah Prof. F. Lalnunmawia hian HSLC leh HSSLC pass tharte hnenah lawmpuina citation a hlan a. A bial chhung veng leh khaw hrang hrang atanga pass tharte chu a lawmpui takzet tih a sawi.
Bialtu MLA hian HSLC leh HSSLC pass tharte chu central leh state civil service bakah sorkar hna tha tak thawk thei tura an tlin lohna tur bik a awm lo tih a sawi a. Tun atanga kum 7/8 velah chuan a bial atang hian officer eng emaw zat neih belh a beisei thu a sawi a. “Sorkar hna chauh nilo, business leh entrepreneurship lamah pawh hlawhtling tur chuan taimakna leh remhriatna a ngai a, mahni tui zawng hriat chian a tul hle a ni,” a ti.
Hlimen a zirlai pass thar te lawmpuina hun hi Local Council Chairman Lalhmingliana’n a kaihruai a, Melthumah hian Dengrotluanga, MNF Unit President in kaihruai thung.