Aizawl: Thawhlehni zan khan Vantawng Group YMA bultumin Vantawng Group YMA Rûn-ah Thenzawla tlawmngai pawl – YMA, MUP, MHIP, MSU leh political party hrang hrang aiawh thukhawmin Thenzawl district a pian theih nan theihtawp chhuaha hmalak an rel a. Hma la tur hian Thenzawl District Demand Committee dinin hruaitu turte an inruat nghal.
Vantawng Group YMA President C Lalnunthara kaihhruai thutkhawmah hian Thenzawl district a pian theih nan theihtawp chhuaha hmalak an rel a. Thenzawl District Demand Committee Office bearers atan tlawmngai pawl hrang hrang aiawh inruat chhuakin, adviser atan Thenzawla block party hrang hrang president theuhte an ruat.
Thutkhawmah hian Thenzawl district a pian theih nan tun hma lam atanga hma lo lak ve tawh thin a nih dan te, tun hnaiah Thenzawl Area MUP Conference leh Vantawng Group YMA inkhawmpui rorelah te Thenzawl district siam a nih theih nan sorkarah thlena hmalak nise tia an lo pawm tawh thu te, Mizoram leh Thenzawl hma lam hun zel tur ngaihtuaha Thenzawl chu khawpui lian zawk ni tura buatsaih zel a pawimawh thu te, kawng hrang hrang ngaihtuaha Thenzawl district siam chu awm an tih thu te an sawi ho a ni.
Hetih lai hian tharum thawhna leh nawrhna huaihawt ang zawng ni lo va, theihtawp chhuaha thuneitute hnena ngen leh an duhna lantir tha an tih thu te, Thenzawl district huamchin tur ang te ruahmanna siam a, khaw hrang hrang te thawhpuia sawm tha an tih thute, a tul anga hmala turin leh ruahmanna te siam turin Thenzawl District Demand Committee kutah an dah bawk.
Thenzawl District Demand Committee
Chairman: C. Lalnunthara, President, Vantawng Gr. YMA
Vice Chairman: ZD Dengkunga, President, Thenzawl Area MUP & Lalhmingliana Hrahsel, President, Joint YMA
Secretary: Lalhmingmawia Sailo, Secy, Vantawng Group YMA
Asst. Secy: Sailianpuia Sailo, President, MSU Sub-Hqrs., Thenzawl
Treasurer: R. Vanpari, President, Ramlai Block MHIP
Fin. Secy: Biaknghinglovi, President, Thenzawl Joint MHIP
Advisers : Political party tina Block President