Tun hnaia Congress party zawm thar, chief secretary hlui, Lalnunmawia Chuaungo chuan party tinah MLA fel tak tak awm teuh mah se, chief minister berin a zir loh chuan ramin hma a sawn dawn chuang lo tih a sawi.
Congress party chuan nimin khan an pisa-ah political session an hmang a. He hunah Lalnunmawia Chuaungo chuan thu sawiin MNF leh Congress party chu Mizorama party ruhrel lian ber a, sorkar tur erawh chuan neutral vote a pawimawh tih a sawi.
Congress President Lalsawta chu Mizoram mipui rin ber a ni tih sawiin Lalnunmawia Chuaungo chuan, “Sorkar kalphung thlak a, siamtha thei ber tur chu Chief Minister an nih miau avangin tunge Chief Minister atan tha ber ang tih thlir chunga vote thlak tura mipui kan zirtir a pawimawh a ni. Kan Chief Minister tur hi thil te thamah a rinawm a, thil lian thamah a a rinawm bawk,” a ti.
Lalnunmawia Chuaungo chuan ramin chief minister tha a mamawh tih sawiin, “chief minister tha kan neih theihna turin ngaihtuahna fim tak hmang turin Zoram mipuite ka chah duh a ni,” tia sawiin, party tinte hian an manifesto-ah eng nge an dah tih hi zir chian a ngaih thu leh hmasawnna ngialnghet engtin nge an thlen ang tih an ngaihtuah a tul tih a sawi.
Congress party chu India ram zalenna sual chhuaktu, hnam tenaute dikna humhalhtu an ni tih sawiin chief secretary hlui chuan, “Hnam hnufual zawkte leh sakhaw tlem zawkte hian thlavang hauhtu an mamawh thin. Congress Party chuan chung mite thlavang hauhin a humhalh thin. BJP erawh chuan tuna India rama hnam leh sakhaw chungchang buainaah a ngawi reng a, an thlavang hauh a hauh duh tlat loh avangin hei hian Congress party ropui zia a tarlang,” tiin, sakhaw zalenna vawng him a veng him tur chuan Congress party a awm a ngai niin a sawi.
Mizoramah hmasawnna hna tam tak thawh a ni tawh a, thawh zawh hman rih loh te pawh a awm a, ram leh hnam din chhuahna tak tak atana thawktu tur atan Congress Party lo chu an awm chuang lo tih sawiin, kum 2023 inthlan zawh atangin Pathian duhdanin Congress party chuan ram leh hnam tan hna a thawk tan dawn a ni, a ti bawk.