Aizawl: Law & Judicial Minister T.J. Lalnuntluanga chuan nimin khan District Court Khawzawl sakna tur, thawktute chenna hmun tur Residential Area leh District Jail sakna tur hmun ruahmante a enfiah a, hemi hnu hian 2nd I.R. Bn. Hqrs. Khawzawl a tlawh bawk.
District Court hmun atana ruahman, Martar Thlan hnuai leh Judicial Officer leh Staff-te chenna tur Residential Area atana tih Bangla Mualte bakah district jail hmun tura ruahman Keikhumte a enfiah a. District Court, Residential Area leh jail-te a rang lama sak thuai a nih theih nan mi thiamten a tul angte bawhzuiin an enfiah nghal a. Court hmun tura ram ruahman hi karleh Thawhtanni atangin Darngawn VC te’n an samfai ang a, July thla tir lamah a hmunhma hi tehfel a ni ang.
Chawhnu lamah Law & Judicial Minister hian 2nd I.R Bn. Hqrs. Khawzawl tlawhin Saidingliana, MPS, Commandant leh hotu pawimawh dangten an dawngsawng a. Headquarters hmalakna tlangpui leh tul dangte an lo thlen a ni.
Law & Judicial Minister T.J. Lalnuntluanga chuan IR Police-te chu nunau leh mipuite thlamuantu leh venghimtu, mipuite him nana pawimawh tak an nih thu a sawi a. Sorkar chuan police hlutna leh pawimawhna hriain a thuam chak zelna atan theihtawp a chhuah a. Chutih mek laiin, khawvel pum min tibuaitu hripui vangin duh angin hma a lak chak theih lova, a tul anga thuam chak zel turin ruahmanna a nei mek a ni, a ti bawk.
Minister hi Sylvie Zomuanpuii Ralte, MJS, Addl. District & Sessions Judge, Champhai Judicial District, Lalfakzuala Addl. DC Khawzawl, Pu Lalchhuanthanga SP Khawzawl, Thomas Lalrammawia, MJS, Deputy Secretary, Law& Judicial Department, Zonunpari, Architect, PWD leh mi pawimawh dangten an tawiawm a ni.