Chief Minister Zoramthanga chuan Mizoram hi hnam dang laka zahawma a awm theih nan leh Mizo nihna zahpuiawm a nih lohna turin malsawmna haichhuah tur a awm thu a sawi.
Nimin khan chief minister hian Hnahthiala PWD Division office thar a hawng a. Hnahthial Electric Veng Community Hall-a hawnna inkhawm neihah thu sawiin Zoramthanga hian, ram inrelbawlna tha zawk a thlen theih nana district siam belh a nih thu leh he;ng district siam belhte thuam thatna tura hmalak a nih thu a sawi a. Sorkarin a hmachhawpte tihlawhtling tura theihtawp a chhuah thu sawiin, “Tikhaihlaktu harsatna hrang hrang awm chung pawhin hmasawnna tam tak hmuh tur a awm a, neitu rilru pu a, hnam hmangaihna nen chuan hmalakna tha siam zel a pawimawh a ni,” a ti.
Chief minister hian Mizoramin rambuaite paltlangin, theihtawp chhuaha tanrualna avangin remna leh muanna a neih thu a sawi a. He remna leh muanna hmang tangkaia ram nuam leh entawntlaka ram hi siam tur an nih thu a sawi a. Mizoram hi hnamdang laka zahawma a awm theih nan leh Mizo kan nihna zahpuiawm a nih lohna turin malsawmna haichhuah tur a awm tih hria a ram hmangaihna nen hma lak hopuiah mipui leh thalai pungkhawmte a sawm.
He hunah hian Health Minister Dr R Lalthangliana chu khualzahawm niin thu a sawi bawk.
PWD Executive Engineer thuthmun tur, PWD Division Office thar hawn takah hian EE pakhat, SDO pathum leh staff dangte an awm dawn a ni.