MNF Vice President Vanlalzawmna chuan MNF chu Pathianin a puih thin thu a sawi.
Nimina Mizo Hnam Run chhung inkhawmah thu sawiin Vanlalzawma chuan MNF chu Pathianin a hre reng thin a, a tanpui thin tih sawiin, “Tun hnai chhova inthlana kan chet that tawk lohna te chu, opposition party te boruak thalo leh chetchhiatna ten a hliahkhuh leh thuai a. Chu chuan party mipui min tiphur thar leh a, sorkar leh ngei turin kan bei a. Kan sorkar leh ngei pawh a beisei awm hle a ni. Hengte hi Pathianin kan thatna tura rem a ruatna zel a ni,” a ti.
Kolodyne Multi-Modal Transit Transport Project (KMMTTP) chungchang sawiin Vanlalzawma chuan, “He project hi peih fel a ni thuai dawn a. A hlawhtlin hunah chuan kan hawilam kan thlak deuh vek dawn a ni,” a ti a. Paletwa leh Sittwe-ah te lawng chawlhna peih fel a nih deuh vek tawh thu leh chhim lam atangin bungraw tam zawk man man zawka chawk lut a nih tawh dawn avangin Mizoram kaltlangin phai lam atangin bungrua leh mamawh an rawn la tawh zawk dawn niin a sawi.
Vanlalzawma hian KMMTTP a hlawhtlin theihna atan hun hmasa lam atangin Chief Minister Zoramthanga leh Deputy CM Tawnluia bakah MP ten tha an thlawh hlawk hle tih a sawi bawk.
Hnam Rûn chhung inkhawm hi MNF Gen Hqrs Adviser nia Adviser to CM ni bawk, C Lalramzauva’n a kaihruai a ni.