Myanmar-a an hruaitu paih thlak tak, Aung San Suu Kyi-i fa naupang ber chuan sipaite chu lung in atanga a nu chhuah turin a ngen.
“Ka nu hi tan ina awm rengtir ka phal lo a ni,” tiin Kim Aris chuan BBC Burmese-in London-a an kawmnaah a sawi a, khawvel hruaitute chu amah pui tura na zawka che turin a ngen.
Suu Kyi-i hi kum 2021-a sipaiten mipui sorkar an paih thlak hnuah thubuai eng emaw zat siamsak niin kum 33 zet tang tura tih a ni.
Myanmar ram hi tunah hian tual chhung indona hmunah a chang mek tawh a, mi sang tam tak an thi tawh.
Aris-a hi British mi a ni tawh a, sipaite hian a nu chungchang leh a hriselna dinhmun engmah an sawi lang duh lo tih a sawi a. Burmese embassy, British Foreign Office leh International Red Cross be tawhin puih theihna an nei lo niin a sawi.
“A hma kha chuan chanchinbua sawi emaw, inrawlh thuk lutuk kha ka duh lo a ni,” tiin Aris-a hian khawvel huap chanchinbu hmaa a inlan hmasak berah hian a sawi a. Kum 1989 leh 2010 inkar, kum 15 dawn a nu an man hmasak lai pawh khan engmah a sawi ngai lo.
“Politics-ah hian inhnamhnawih loh thain ka hria a. Ka nu pawhin inrawlh lo turin min duh a; mahse, tunah hian tantir a ni a, sipaite hian chhan tha an nei bik lo va, thil hi ka sawi thei niin ka inhria,” a ti.
Nobel Peace Prize hial dawng tawh, Suu Kyi-i hi mipui rorelna a awm theih nana khawvela hruaitu langsar ber pakhat a tling a. Kum 2010-a chhuah a nih pawh khan Myanmar bakah khawvel hmun hrang hrangah lawm a ni.
Hemi hnuah hian Myanmar-ah hian Muslim Rohingya suat an ni a, UN International Court of Justice (ICJ)-a an ram aiawha a dinnaah hetih laia a kaihhruai sorkar chet dan chu a tan tlat avangin dem a hlawh a. Mi nuai nga dawnin tun hnaiah Myanmar hi chhuahsanin an thenawm ramah an raltlan phah a, a tam ber hi Bangladesh-ah an khawsa mek.
Aris-a hi a nu an sawisel chungchanga BBC-in biak a tum laiin engmah a sawi duh lo bawk.
Suu Kyi-i hi sipaiten an paih thlak hnuah pawn chhuak thei lova hren a ni a, nikum khan an khawpui, Nay Pyi Taw-a sipai tan inah dah a ni a. Kum hnih dawn chu a chanchin engmah hriat thar tur a awm lo va. A damlo nia ngaihna a awm a; mahse, sipaiten chutiang a awm lo niin an sawi thung.