Taliban chuan Afghanistan-in an thenawm ram, Tajikistan a kalpawhna khân pui ber an la niin Afghan province thuneitu leh sipai officer ten Thawhlehni khan an sawi a. Venhim hnathawktuten an hmun an tlanchhiatsan niin an sawi.
Shir Khan Bandar hi Afghanistan hmar lam kila awm niin Kunduz khawpui atanga km 50 chuang hreta hla a ni a. Kunduz hi United States sipaiten an ram chhuahsan tuma an insingsak mek laia Taliban-ten May 1 atanga lak tuma beihpui an thlakna a ni.
“Vanduaithlak takin tukin zing lama darkar khat vel inbeihna a thlen hnuah Taliban hian Shir Khan port leh khua leh Tajikistan bula border check post-te an la ni,” tiin Kunduz provincial council member Khaliddin Hakmi chuan Thawhlehni zan khan a sawi.
Army officer pawhin, “Check post zawng zawng chhuahsan kan ngai ta a, kan sipai thenkhat chuan ramri kânin Tajikistan lam an pan,” a ti.
“Zing lamah Taliban fighter-te hmun tinah hmuh tur an awm a, za vel zet an ni,” tiin AFP news agency hnenah a sawi.
Taliban thupuangtu, Zabihullah Mujahid pawhin an indo miten Pyanj River bula ramri kânna (border crossing) chu an la tih a sawi ve bawk.
“Kan Mujahideen-te hian Shir Khan Bandar leh Kunduz-a Tajikistan nena inkalpawhna zawng zawng an thunun tawh,” tiin AFP a hrilh.
Afghanistan-a UN special envoy-in Taliban fighter-te hian May thla chin atang khan district 370 zinga 50 an la tawh tih a sawi a, an beihna hian buaina nasa tak a thlen tih a sawi a. “Himna a derthawng tak zet a ni,” a ti.
“District an lakte hi province khawpui chhehvela mite an ni a, ram dang sipaite an inthiar chhuah mek lai hian Taliban-te hian khawpui pawh la turin tanhmun an siam rem mek a ni,” tiin UN Secretary-General-a Special Representative for Afghanistan Deborah Lyons chuan UN Security Council-ah a sawi.
Taliban hian US sipai 2,500 atanga 3,500 vel leh NATO sipai 7,000 la awmte Afghanistan atanga inthiar chhuah tuma insingsak mek lai chu remchangah an lo hmang ve niin an sawi.
Sorkar leh Taliban hi Qatar-ah inremna zawngin an inbe mek zel a; mahse, inremna an la siam thei lo.