Tripura High Court chuan nimin khan state sorkar chu Sarbya Sikhya Abhiyan (SSA) hnuaia thawk zirtirtute dah nghet vek turin a ti.
Dan hre mi hlun tak, SSA zirtirtute aiawha court-a ding, Purushottom Roy Barmanchuan he thuremna hi SSA hnuaia primary leh upper primary zirtirtu mi 4,000 chuangin an chhawr dawn niin a sawi.
Advocate hlun tak tak pathum – Purushottom Roy Barman, Soumik Deb leh Samarjit Bhattacharjee chuan SSA zirtirtute thil duh chu hnialin sorkar tan an ding ve thung.
Thubuai hi Tripura High Court-a judge pahnih, Chief Justice AA Qureshi leh Justice SG Chattopadhyay chuan an ngaihtuah.
Court chuan SSA zirtirtute hi kum nga an lo thawk tawh a, sorkarin a dah ngheh chu a tih ngei tur niin thu an rem.
SSA zirtirtute chuan high court thu remna hi an lawm hle a. An dam chhung khawsakna theih dan tur rel chhuah a nih thu an sawi.
Kum 2017 daih tawhah khan SSA zirtirtute hian dah ngheh ngiatin ni sarih chhung chaw ngheiin an lo nawr tawh.
Hetih hun laia eptu lama tang, BJP chuan kum 2018 assembly inthlana an sorkar a nih chuan an dah ngheh nghal tur thu an tiam nghe nghe.
Inthlan zawhah hian BJP hian party dangte thawhpuiin sorkar an siam ta ngei a; mahse, an thutiam chu tun thlengin an tihpuitlinsak lo thung.
BJP hian dah ngheh loh nana hnialnaah SSA zirtirtute chu sorkar laipui mi chhawr an ni a, state sorkarin lo dah ngheh chu a rem lo niin an sawi.