- Nawlchunga Chinjah; Meisatla, Siaha
Harsatna dangte a thleng a, kan Lal Isua a lo kal thutte a nih ngawt loh chuan, tun kum tawp lamah kan ram min hruaitu tur MLA thlanna kan nei leh dawn chu a lo ni leh ta reng mai a, he MLA thlan hunah hian eng party in nge sawrkarna siam ang a, tu nge kan ram hruaitu lu ber ni ang tih chu sawi mai theih leh rin mai theih pawh a la ni lova; chutih rual chuan, thil chiang tak pakhat erawh chu, eng party emaw tak chuan sawrkarna an siam ang a, tute party emaw chuan kan ram kaihhruaina hna hi an thawk ang a, kan ram hi tute emaw party kaihhruaiin kan awm dawn tih hi a ni. MNF in nge, Congress in nge, ZPM in sawrkarna siam ang tih chu tu sawi lawk theih mah a ni hauh lo. Sawrkarna siam lah chu an in ring theuh mai bawk si a! BJP chu tun dinhmunah chuan sawrkarna siam thei dinhmunah an la ding lo ti ila kan sawisual em lo ang chu maw.
State puitling kan nih atang kum sawmli a tling tep tawh a, PC party in reilote ram kaihhruaina hna an thawk tih loh chu, he kum chhung zawng hian Mizorama party lian ber pawl pahnih Congress leh MNF party ten sawrkarna insiam chhawkin, kan ram kaihhruaina hna an thawk a, chung hun chhung zawnga ram an kaihhruainaah leh tuna kan ram dinhmun min thlenpui chinah hian duh khawp lohna tam tak kan nei ang tih a rinawm – mipuite hian. Sawiselna tur leh sawichhiatna tur tam tak an awm ngei bawk ang. Chutihrual chuan, fakna tur pawh tam tak an awm ve tho ang. Kan ram hruaituten ram an sawpchhe zo tep ang leh, eng hmasawnna mah min thlenlo tih ang zawnga sawi chu a dik hauh lovang. Kan ram hruaitu chawlta te leh, tuna kan ram hruaitu ni mekte hian ram tan hmasawnna tam tak an thawkin an ti tih hi kan hriat reng a tul, chutihrual chuan, mihring ve tho an nih avangin tih dikloh leh tihsual, tih fuhloh pawh tam tak an nei ve ang tihte hi kan hriatsak a tul a, sawisel a, sawichhe ngawt lovin hmasawnna kawng kawhhmuhtuah, finchhuahtuah tan te hi tum zawk fo ila – kan mi thiam tam takte leh ram hmangaih a, ram veitute hian.
A eng a pawh chu ni se, kan ram lo kaihruai tawhtute, kan hruaitu hmasate leh ni mekte sawisel reng a, sawichhiat reng hi thil tha ber leh fel ber a ni lem lo.
Kan hruaitu hmasaten ram an lo kaihhruai tawh dan leh vawiina kan ram dinhmun min thlen pui chin ka sawi tum ber a nih loh avangin kum tawpa MLA inthlan kan hmachhawn turah hian, eng ang mite nge kan ram hruaitu tur atan kan thlan chhuah ang? Tih lampang i han sawi daih teh ang. Party tan bik kan nei lovang. Ka awmna party pawh ka tan bik chuang lova.
Mi huaisen:- MLA lo ni tawh leh ni mekte zingah hian mi dik leh rinawm tam tak an lo awm tawhin, an awm mek bawk ang tih hi a chiang a, chutih rual erawh chuan, he ram hian mi dik leh rinawm chauh ni lovin, huaisenna nei tel bawk a mamawh tih loh rual a ni ta lo. Kohhran a ni emaw, NGO ah a ni emaw, party ah a ni emaw, eng pawl pawlah emaw pawh ni rawh se, hruaitute hi kan zah thiamin, an thu pawh kan awi thiam tur a ni teh meuh mai, chutih rual chuan, thil dikloah leh thu dikloah pawh thil dik leh thu dik pawh tan ngam lo khawpa hruaitute thu thua awm mai mai mi nih erawh thil tha a ni hauh lo. Hruaitu tha, hruaitu ropui, hruaitu entawn tlak leh chawimawi tlak ni tur hian dikna leh rinawmna ringawt hi a tawk zo lova, huaisen tel a tul tlat. Thil dikloah leh thu dikloah chuan hruaitu lian zawkte pawh hnial ngam, ep ngam, sawisel ngam tur mi thlan chhuahna chang hriat a tul ta hle mai.
Mahni pumpui aia ram hmangaih tak taktu:- Tawngka maia ram hmangaih a, veitu ni lovin, thil tih leh chetze hmanga ram hmangaihtu tak tak hi kan mamawh tawh hle niin a lang. Kan hruaitu tam takte hi chu tawngka maia ram hmangaihtu, ram veitu, ram leh hnam aia mahni pumpui, mahni chi leh kuang, thenrual thate hmangaihtu an ni ti ila a sual lo khawp ang. Hnial hrat thenkhat ten, eng vangin nge mahni pumpui, chhung leh khat, thenrual thate, kan mihringpuite chu kan hmangaih loh vangin in lo ti leh hman mai thei, kan sawi tum tak zawk chu, ram hruaitu chuan ram a kaihhruaina kawngah chuan mahni chhungkua, chi leh kuang inhaivurna lam tur aiin, ram hmasawnna tur hi ngaihtuah hmasa se, dah pawimawh hmasa se tih hi kan sawi laimu tak zawk chu a ni.
Tin, kei hi ka thil ngaihtuah dan hi a zim vang nge ni ang a, ka thil thlir dan a zau tawk loh vang ni ang tih ka hre lo, ram hruaitu tur atan sawrkar hnathawk chawl tawh (pensioner) hi kei ka duh der lo mai a. Sawrkar pawn a chhawr duh tawh lo, a hna atang lo chawl tawh rawh se tia an hna atang a chawlh tir tawh ten politics an khel zui leh thin hi chu ram an hmangaih vang ni theiin ka hre lo tlat pek a, lalna leh thuneihna an duh vang maiah ka ngai. Ram hmangaih tak taktu chuan, ram a vei a, ram siamthat a duh a nih chuan, a hna abikin, a sawrkar hna thawh lai bansanin politics a luhchilh ngam turah ka ngai. Hetiang ang mite hi chu ram aia mahni pumpui hmangaihtute huangah dah theih an niin ka hria.
Thil tih tum (manifesto) felfai nei:- Ram hruaitu chu mipui chunga leng, mipui bakah ram leh hnam kaihhruaina hna, hna ropui tak leh hautak tak mai thawktu a nih miau avangin, ram a kaihhruai dan turah ruahmanna felfai tak leh, ram tana thil tih tum ( manifesto) felfai tak nei mi ni tur a ni phawt mai a, chuvang chuan, ram leh hnam tana hmalakna tur hmachhawp (policy) fel fai tak nei lemlote hi chuan eng ram ropui mah min thlen dawn lo tih hi a chiang em em mai a, chuvangin ram tana thil tih tum leh hmachhawp tha tak sawi tur nei lemlo te hi chu kan hnawl ngam a hun tawh viau mai.
Mi rilru nghet:- Nihna chanvo tha duh vang mai mai te, hlawkna leh hamthatna duh vang mai mai tea mahni awmna party sawn mai duh tur ang chi, mi rilru nghet lo leh bulbal lo ang chi te hi hnawl ngam an hun viau. Heng mite hian ram hmangaihna tak tak an nei lem lo. An hlawkna tur, an dinhmun thatna tur, chanvo tha an chan theihna tur hmun a nih chuan an sawisel an sawisel party ah ngei pawh awm an hreh lo fo va, hetiang mite hi hruaitu tha an ni mawh khawp. Ram tan han hnemhnanpuina tur an vang phian. Rilru bulbal nei lo, tli ina a duhna lam lama a chhem nghin mai mai theih luang ang leka duhna lam lama thle kual thei, rilru nghet lote hi ram hruaitu tur atana awhawm an ni lo.
Kan sawisel turte ni lovin, kan faka, kan chawimawi theih turte ngei kum tawp MLA inthlan lo awm turah hi chuan bial tin mipuite hian thlan chhuah i tum theuh tawh ta ila. Kan sawisel lehtur ram hruaitu kan thlang chhuak thin hi chu a zialo thin em mai.