Indonesia lailia Sulawesi province-a dan lova rangkachak laih chhuahna hmuna lei minah mi paruk an thi a, dam an la awm beiseiin chhanchhuah hna thawktuten an bei mek.
Buranga khuaa Nilaini zana chhiatna thlenna hmunah hian chhanchhuah hna hi police, sipai leh tual chhunga local disaster agency tanghovin khawl lian tak tak nen an thawk mek.
Nimin khan mi 15 vel dama lak chhuah tawh a ni.
Search & rescue agency thupuangtu Fatmawati chuan mi pakhat chin hriat a la ni lo niin a sawi.
“Thi zingah hian upa pawh an tel,” tiin search & rescue agency-a an hotu, Andia Sultan chuan a sawi.
Disaster thuneitute chuan ruah sur nasa leh lei nghet bawk si lo chu lei a min chhan ber niin an sawi.
Indonesia-ah hian dan lova thil laih chhuahna hmun siam hi a tam hle a, chhiatna a thlena thawktute himna lam a derthawng hle.
Lei min, tui lian leh lei verh chim tihte chu thil laih chhuahnaa chhiatna thlen chhan langsar zual a ni a. Thawktute hian rangkachak tihfai nan pawh mercury leh cyanide an hmang a, invenna pawh an hmang ngai lo.