Wagner chief Yevgeny Prigozhin chuan a sipaite chu ‘Russian thisen luang zel tur ven nan’ Moscow luhchilh an tum chu a titawp ta a, amah pawh Belarus-a a himna tura awm a tum a. He thil thleng hi President Vladimir Putin-a’n thuneihna rei tak a chan tawh chhunga chona a hmachhawn lian ber a tling.
Prigozhin-a hian a sipaite hian Russian khawpui hi km 200 chauhvin an la thleng lo tih a sawi a, inthahna thleng zel tur ven nan Inrinni khan a ko kir ta a ni.
“Wagner military company hi tihtawp an duh a. Dikna hlen chhuah tumin June 23 khan kan thawk chhuak ta a ni. A hun a thlen chuan thisen a luang thei a ni,” tiin Prigozhin-a hian audio message a tihchhuahah a sawi.
“Kawng lehlama thlirin Russian thisen luanna turah mawhphurhna a awm a, kan sipaite chu kirtirin ruahman angin camp lam pantir an ni,” a ti.
Moscow khawpui hi mi mal hnuaia awm sipai, pawikhawihtu tura din, hel zui taten an luhchilh turah hian an inbuatsaih nasa hman a, chhim lamah chuan checkpoint siamin ralthuama thuam lirthei nen an inchhawp a. Red Square pawh khar niin mayor pawhin kawngpui thenkhat chu lirthei tlan lo turin a ti.
Wagner sipaiten Russia laka helna an chhuah ta mai hi Putin-a’n an rama ro a rel dan leh a sipaite chet dan avanga an lungawi loh vang a ni ber.
Belarusian hruaitu, Alexander Lukashenko chuan Putin-a nen an sawi duh hnuah mercenary boss hi Wagner sipaite chetna titawp turin a dawr a ni.
Prigozhin-a hian Lukashenko-a’n a dawrna chu pawmin Wagner group kal zel leh boruak siam zel tumna chu a titawp zui ta tih Lukashenko-a pisa chuan a sawi a, rauhmanna an siam zingah Wagner sipaite hnena venhimna pek pawh a tel.
Prigozhin-a hian Defence Minister Sergey Shoigu-a chawlhtir a phutna chungchang chu Kremlin-in engtin nge a chhan tih a sawi lo.
Wagner chief hi an thenawm, Belarus-ah hian insawnnin a laka thubuai siam zawng zawng pawh tihtawp a ni nghal dawn tih Kremlin chuan Inrinni khan a sawi.
A sipai, amah zuia che chhuakte pawhin hremna engmah an hmachhawn dawn lo va, defence ministry chuan inbiak kher erawh ruahmanna a awm loh thu thupuangtu, Dmitry Peskov chuan a sawi.
Lukashenko-a hi Putin-a remtihnain indawr tur hian tih a ni a, Prigozhin-a nen hian kum 20 chuang an lo inhre tawh niin Peskov chuan a sawi a. “Thisen luang, chhung lama inerna leh intihbuaina tha lo tak thleng thei ven nan thiltih a ni,” a ti.