Aizawl: MPCC Campaign Committee ruahmannain Inrinni zing khan MPYCC chuan Aizawl Chanmari Bazar bulah a thawh thumna atan that loh theih lohna sorkar tha, kalphung dik siam tura hmalakna beihpui street campaign an nei.
MPCC Treasurer Dr Lalmalsawma Nghaka chuan thu sawiin, Congress sorkar kal ta khan thil tha tam tak thawkin hmuntin ram tinah hmasawnna nasa tak thlen mah se, tihfuh tawk loh leh tha lo lai a awm tih erawh an phat loh thu sawiin, “Pu Lalsawta hovin Pathian tihna nen tihfuh tawk loh te chhui letin, a tha lo lai siam tha a, a tha thei ang bera ram leh hnamin hma a sawnna tura theihtawp chhuah hi Congress party tum ber a ni,” tiin, Tang Puihna hmanga thawkrim leh mi taimate dinchhuahna ramah Zoram hi siam a, mipui huapzo sorkar, mi nawlpui tana innghahna leh thlamuanpui tham sorkar tha leh kalphung dik an siam dawn tih a sawi.
Lalrindika Hachhek bialtu MLA pawhin thusawiin, “Pathianin kan tan liau liau a min pek, Mizoram hi a chhunga mipuite hian kan tichhe tur a ni lo a, a thatna turin theihtawp chhuaha kan beih bakah humhim tlat hi mitin mawhphurhna a ni. Chumi tur chuan mipuite pawhin kan theihtawp kan chhuah a, sorkar tha siam thei tura party belh tlak, hruaitu dik leh rinawm, sorkar tha siam tura a kalphung dik leh dik lo lai hrechiangtu Pu Lalsawta leh a kaihhruai Congress party hi kan thlan tlin a ngai a ni,” a ti.
MPYCC Vice President Lalsanglura Sailo kaihhruai Street Campaign ah hian AMC Corporator Rosiamngheta, Hriata Chhangte leh tun hnaia Congress party zawm thar, chief secretary hlui Lalnunmawia Chuaungo te pawhin thu an sawi.