Huntharin inringtawk zawkin an khel zui thei dawn a, Zirtawpni zan Tata SK 712 Pro Volleyball League semifinal urlawknaah 3-2-in Chhinga Veng Spikers an hneh.
R. Dengthuama Indoor Stadium, Mualpuiah hmaan hruaina hum zui thei lo zel mahse a tawpah 25-21, 20-25, 25-22, 24-26, 15-13-in Hunthar an chak a, Chhinga Veng chunga inhung chungin league an khel zo.
Hunthar captain Remsangzuala’n hmun pawimawh luahin point nga a thawk chhuak a, setter zinga D3 Business Player of the Match lawmman dawng hmasa ber a, dangtu awm lovin vawi 17 a vuaktir a ni.
Vawi nga an khelhah tum li Hunthar chakin point 10 an hmu a, pahnihna ni chungin an tlang. A tum hnih nan Chhinga Veng tlawm mahse set hnih an lak vangin point khat an hlawh chhuak a, a vaiin point 10 tho kawlin pathumnaah an awm a, June 28, Nilaini zanah Hunthar nen tho semifinal an intawng ang.
TNT an hneh loh tuma beisei pha lo Gagandeep Singh leh Laldensanga’n mi malin hma an sawn a, Hunthar tan chanchin lawmawm niin set hmasa berah derthawng lovin an tlang.
Set an hloh hnuah Javed Khan chuan Spikers fuih phur ve thungin Lalbiakmuana’n hriam takin a khel a, point 22 ve ve hmuin vawi kua tisual Biakmuana aiin Rajasthan spiker-in point liin a hloh tlem.
Javed chuan a vuak tlak hnuah lehlam hlap a dang a, Biakmuana’n hetiang bawk hian point hmu zawn ve leh. 24-20-in Spikers an sang a, Javed chuan lak theih lovin a service a, inkhel boruak a tidanglam.
Tlang chiang sa tawh ve ve an ni a, Chhinga Veng coach Jesse Lalpianpuia’n Javed leh setter David Lalramhmachhuana a chawlh hahdamtir a, Mizoram hlangin an khel zui.
Tuipuiral hmaah set khatna chiang taka an lak hnuin Huntharin player enchhin nan an hmang a, harsatna tawkin harsa takin an chak hram. Chhinga Veng lakah erawh chak ngei tumin player an thlak kual ve lo.
Remsangzuala’n a vuak tlak rualin 19-13-in Hunthar an sang a, inkhel thununin derthawng hman lovin set thumna an la. Mahse, 24-21-a sang zawk an nih laiin Zomuansanga’n zawn chhuah ngaiin a ke ding lam a tina a, semifinal a khel thei dawn em a chiang lo.
Khawhai tlangval hian a khelh chhungin vawi 11 vaw tlain tum li a tisual a, point 31 hmua 11 paihtu Gagan tih lohah Hunthar tan thawh hlawk ber a ni a, Densanga’n tum 13 hlap tla mahse point sarih a paih.
Chhinga Vengin zangkhai takin an khel a, zuang sang tak K Lalfakawma leh Joseph Lalbiaksanga’n tihsual hlau lovin ball an vaw tam. Set linaah an inhnehtawk hle a, Biakmuana’n a hlap tlak hnuah 25-24-in Sikers an sang a, Densanga’n hun tha a neih vaw chhuakin set nga an khel a tul.
Spikers-in Javed luhtir thar leh mahse Hunthar an intel ruh zui tlat. Inkalsan thei lovin 13-13 thlenga an intluk chhoh hnuah Punjab police Gagan chuan a vaw tla a, net bulah a elpui Javed-a hlap chiang takin a dang tla zui leh nghal.
Chak zo lo chungin Chhinga Vengin player rin ngam an nei nual tih an lantir a, Faktea’n tum 16 vaw tlain point 10 a hloh a, vawi khat chiah tizualin Biaksanga’n vawi 10 a hlap tlak bakah Samuel VL Nunhlima leh PC Lallianmawia’n point riat ve ve an thawh bawk.