Aizawl: Inrinni khan Vaivakawn Yma Hall-ah, Central YMA chuan kumin 2023-a HSLC & HSSLC Exam hlawhtlingte leh sawm bikte pualin zirlaite hma lam hun thlirpuina hun hmangin ‘Career Guidance’ hun an hmanpui.
Chawhma hunah R Lalngheta, President, CYMA chuan thu sawiin, zirlaite chu Mizo hnam innghahna an nih avangin thahnemngai taka zir zel turin zirlaite a chah.
Fuihna thu sawi tura sawm bik Rev Dr Lalchungnunga pawhin zirlaite fuihna thu tha tak tak a sawi bawk.
Chawhnu hunah Lalhruaitluanga, Founder & Managing, Director, ZoCareer Solutions-in zirlaite tan an kawng zawh tur kawng inkawhmuhna (Career Guidance) hun a hmang bawk.
Central YMA chuan he programme hlawhtlin nana sum thawhtu W. Chhuanawma, Vaivakawn chungahte, Vaivakawn Branch YMA-in an hall an hmantir mai bakah reception lam an lo buaipui avangin lawmthu an sawi a. Zirtirna petu tur sawm bik, Rev. Dr Lalchungnunga, Zarkawt leh Lalhruaitluanga te chungah a bik takin lawmthu a sawi bawk.
Hei bakah programme ruahmantu Education Sub Committee, Central YMA te chungah lawmthu a sawi bawk.