Meghalaya-a NGO pakhat member chu a ruka thing laa hralh thin (timber smuggler) nia hriatten an sawisa a, pawl hrang hrangin police-ah FIR an thehlut.
West Garo Hills (WGH)-a Phulbari-ah police station bul lawkah he thil hi Thawhlehni zan khan a thleng a. A’chik Students’ Welfare Association (ASWA), Phulbari unit-a an hruaitu pakhat chu sawisak niin Phulbari CHC-ah enkawl mek a ni.
Zan dar 9:30-a thleng niin ASWA, A’chik Holistic Awakening Movement (AHAM) leh Association for Democracy & Empowerment (ADE)-te chuan Nilaini khan FIR an thehlut nghal.
NGO hrang hrangten Phulbari PS-a FIR an thehluha an ziah dan chuan a hma pawhin a ruka thing laa hralh thinte titawp tur hian sorkarah pawh an lo thlen tawh thin a, awmzia a awm lo niin an sawi.
“Thawhlehni zan khan a ruka Chambakpara atanga Chibinang lam pana phurh tur ni ngei lirthei pahnih hmuh a ni a. Lo tihdin niin Phulbari PS panpui nghal an ni a. Chibinang thlen hma, Bangalkhata bulah mi 20 velin an beih rawn ta a ni,” tiin an pawla mi pakhat chuan a sawi.
Thil thleng an hriat veleh hian Superintendent of Police, WGH, Dr MGR Kumar chuan an ngaihven nghal thu leh Additional SP leh Phulbari OC chu rang taka bawhzui tura tih an nih thu a sawi bawk.