Himachal Pradesh-a Mandi leh Kullu inkar kawngpui lian chu a pin avangin lirthei tangkhang km 15 vel zeta thui an intlar tawh a, mi 200 vel, a tam zawk khualzin an tang bawk.
Kawngpui hi Thawhtanni tlai atang khan tun hnaia ruah sur nasa avanga tui lian thut leh lei min avangin a ping a. Thuneitute chuan lung lian zual tihkerh darh nan puak thei an hman thu an sawi a. Darkar sarih/riat hnu velah erawh an titlang leh hman niin an sawi bawk.
An tan chhung khualzinte erawh chuan hun hrehawm tak an hmang thung.
NDTV-in a tang zinga mi, Sohail Yousuf leh Azaz Hasan a biaknaah Delhi atangin Bhuntar thlawhna tumhmun pan an ni a, kawngpui hmun tam takah a pin thu an sawi a. “Mandi leh Sundarnagar inkarah pawh lei min a tam em em a. Zan dar 10:00 velah police-in min lo tiding a, kir leh turin min ti a. Traffic jam chu km 15 vel zet a ni,” tiin Hasan chuan a sawi.
“Tumah kan lo inringlawk si lo va. Chhungkuaa kal, naupangte pawh an awm a, thenkhatin bus an hmang a. Thenkhatin dhaba (thingpui dawr)-ah an inhnawh puar a, khualbuk awm si lo. An fate pawh an ngaihtuah hlawm khawp mai,” a ti.
Hasan-a chuan heng lai velah hian power project kalpui niin tourist resort pawh a awm a, chuti chung chuan kawng pakhat lo hi a awm lo niin a sawi a. “Kawngpui hi nimin tlai dar 5:00 vel atanga dan tawh kha a ni a; mahse, tun thlengin a la tlang lo,” tiin Thawhtanni chhun khan a sawi.
Yousuf-a chuan engtikah nge kawng an hawn leh theih ang tih chu an hriat thiam phak loh thu a sawi a. “Kan nghak ang a, kan kal zel dawn nge kan kir leh dawn pawh kan hre lo. Engmah police hnen atangin kan hriat belh tawh bawk si lo,” a ti.
Hasan-a hian kawngpui dan a nih hian inhrilh hriat dan tha zawk awm ngei se a tul thu a sawi a. “Nimin chhunah kan chhuak a, helai hi zan dar 10:00 velah kan thleng a. Lei a min hnu darkar nga chuanga chuak chauh kan ni chungin kawngpui a ping tih reng reng kan hre sa lo. Hetah hian kan nghak tawp ringawt mai a, kan thlen chuan km 6 vela thuiin lirthei tang an lo intlar tawh a ni,” a ti.
Khualzin tang ve dang, Adesh Katyayan-a chuan Kullu pana an kal laiin an hma lamah kawngpui a ping tih an hria tih a sawi a. “Zan kan riak a, Mandi lam panin kan kir leh a. Tunah hian Kullu lam panin kan kir leh mek a ni,” a ti a. Car 500 vel zet tang an awm thu leh mi tam takin kawngpuiah hian zan hun an hmang ral mai niin a sawi.
Khualzinte tana lungngaihna belhchheh turin tual chhunga weather office chuan Himachal Pradesh-ah hian ni hnih dang ruah tam zawk a la sur dawn niin an sawi lawk bawk.