- Ruata
India ramin a nghahhlelh 5-door Mahindra Thar chu phochhuah a ni dawn ta a. Khawvel huapa phochhuahna ‘global debut’ chu South Africa-ah neih a ni dawn a ni.
Tarlan tawh angin lei theih tura tlangzarh erawh kuminah a ni dawn lo a. Hei hi Mahindra company lam hotute pawhin an lo sawi tawh a. Mahindra Thar thar hian lirthei leitute pawh a hip viau tura beisei a ni a. A bik takin offroad lama tuite tan chuan duhthusam a ni dawn a, a hmaa Mahindra Thar len zawnga duh thu sam lo leh chhungkuaa nitina hmang duh tur te tan phei chuan kawngka 5 awm Thar lo chhuak tur hi nghahhlelhawm tak tur a ni dawn a.
Kawngkhar 5 nei Mahindra Thar hi a awmzia takah chuan Thar awmsa tih sei hret, long-wheelbase version a ni dawn a. A wheelbase hi 300mm velin a sei belh beisei a ni a, a tlar hnihnaa passenger te tan hmunawl tam zawk a awm dawn a. A hnung seat awm dan tur hi a la hriat chiah lo a ni. A kentel tur pawh tunhnaia lirthei changkang hoa kan hmuh ang hi chu a awm veleh vek hmel a, heng zingah hian sunroof, Android Auto leh Apple CarPlay connectivity nei touchscreen infotainment system thar, front center armrest leh thil dang tam tak a awm dawn a ni. A chhung siamna hmanraw hrang hrang pawh hi tuna 3-door Thar chhuak mek aia dak nalh leh changkang zawk a nih beisei a ni.
A lenzawng lamah chuan kawngkhar 5 nei Thar hi a sei zawng 3985mm, a zau zawng 1820mm, a san zawng 1844mm a ni ang a. Maruti Suzuki Jimny aiin a lian zawk dawn tihna a ni a, Jimny hi a sei zawng 3820mm, a zau zawng 1645mm, a san zawng 1720mm a ni.
A khawl lamah chuan Mahindra Thar 5-door hian tuna 3-door-ah pawha kan hmuh, 2.0L turbo petrol leh 2.2L diesel a hman zel beisei a ni a. A elpui tur deuha ngaih theih leh huang inanga tunhnaia lirthei kan hmuh Maruti Suzuki Jimny-ah hian 1.5L naturally aspirated petrol engine kan hmu a, hei hian 105bhp power leh 134Nm torque a pe chhuak thei a ni.
Kawngkhar 5 nei Mahindra Thar hi Maruti Suzuki Jimny tlangzarh thar nen market lamah an inhmachhawn dawn a. Mahse Thar hi chu engine chak zawk leh lirthei lian zawk, segment sang hreta mi a tih theih a. A man pawh Jimny aiin a to hret beisei a ni.
India rama lirthei company lian leh lar Mahindra hian Mahindra Thar chu lifestyle SUV huanga mi tam takin an hman tangkai theih loh lirthei angin an tichhuak na a India ramah hian leitu an tam em e. Tunah chhuak mek Mahindra Thar 3-door pawh hi lifestyle SUV leh offroader SUV thar tak, helama tuite tana tih bik anga lang ni mahse leitu an tamin nitina lirthei hawl chhuah bera hmang pawh an tam em em a. Heng zawng zawng avang leh a design pawh mi tam tak ngainat a nih avang hian Mahindra Thar hi lirthei hlawhtling tak tih a chiang a. Tuna a lian chi, kawngka pawh tam zawk, nitin veivah nan pawha tangkai tur a lo chhuak leh tur hian market lamah pawh nasa takin Mahindra Thar model chu a puih beisei a ni a. Mahindra pawhin nasa taka hma a sawn pui a beiseiawm a, a lo chhuah hlan a nghahhlelhawm tawh hle a ni.