US president hlui, Barack Obama-a chu India-a Muslim-te chungchang a sawi dan avangin India-a rorel lai party chuan an sawisel nasa hle.
Obama hian kar hmasaa an kawmnaah India hian a tlem zawk (Muslim)-te dikna chanvo a humhalh that loh chuan ‘dah lam an pan’ tiin a sawi a ni.
Obama hian President Joe Biden-a chu zalen ‘democrat zalen lo tak’ a nih leh nih loh chungchang an zawhnaah a sawi chhuak a ni.
Hetih lai hi Indian Prime Minister Narendra Modi-a’n US a tlawh lai tak a ni bawk.
Ni thum a cham chhungin Modi-a hi White House-ah amah lawmna ropui tak buatsaih a ni a, zanriah buatsaihsak niin ram pahnih inremna eng emaw zat ziah a ni bawk a. US Congress-a rorel khawl in hnih member-te hmaah thu a sawi bawk.
Obama-a hian CNN-a Christiane Amanpour-i’n a kawmnaa a sawi a ni a, Congress-a Modi-a’n thu a sawi hma lawka tihchhuah niin India-ah pawh nasa taka thehdarh a ni.
Amanpour-i hian Modi-a hming lam chhuak chuang lovin ‘zalen lo taka kal chu mipui rorelna atan hlauhawm thei niin a hria em?’ tih a zawt a ni.
“Engtiangin nge president hian hetiang chi hruaitute hi lo dawr se, lo dawng se, lo kawm se tha ang?” a ti a ni.
Obama chuan ‘chutiang chuan’ tia sawi a harsat thu leh amahin a hun laia an thawhpui, ‘mipui rorelna ram kalphung lo ang deuhva kalte’ a dawr dan atangin a sawi a. Chung kalphung fuh tawk lote pawh chu chhan hrang hrang avangin inkungkaihna an siampui tho niin a sawi a. US president tan chuan mipui hma leh mi mal thilah emaw, ‘harsatna hrang hrang a awm thei’ niin a sawi bawk.
“President-in Prime Minister Modi a lo hmu a nih chuan, Hindu tamna India-a a tlem zawk Muslim-te himna chu thil pawimawh, sawi chhuah phu tak a ni ang. Kei pawhin ka hriat chian tak, Prime Minister Modi-a hi ka bia a nih chuan ‘India-a a tlem zawkte dikna chanvo hi i hum lo a nih chuan India hmabakah hian inthenna a intan thei’ tih ka hrilh ang,” a ti zui a ni.
Obama-a hi president a nih lai khan Modi-a nen hian an inbe fo a ni.
Indian Finance Minister Nirmala Sitharaman chuan Pathianni khan thuthar lakhawmtute hnenah Obama thil sawi chuan a ‘shock’ thu a sawi.
“Modi-a US-ah zina a awm laiin India chungchang a sawi a, US president-in Indian Muslim chungchang a sawi hi a mak hle,” a ti.
India chuan US nena inkungkaihna tha tak neih a duh a, ‘mahse, India-a sakhuana thila intihduhna thlengte an lo sawi daih’ niin a sawi.
Sitharaman-i hian US hian Muslim tamna, Syria leh Yemen te pawh Obama thuneihna chan laiin a bomb niin a sawi bawk.
Defence Minister Rajnath Singh-a pawhin Thawhtanni khan India hian sakhuana thil avangin tute mah a tiduhdahin a en hrang ngai lo niin a sawi.
“Mite hian India-a sakhaw zalenna kalphung leh nih dan hi an zir a ngai a ni,” a ti a, miin India-a a tlem zawkte dikna chanvo an sawi hmain ‘engtiangin nge Muslim ram an beih’ tih ngaihtuah hmasa thin se a tih thu a sawi bawk.
Obama leh US chuan India-a sorkar hotu lianten president hlui thusawi an helh dan chungchangah hian engmah sawi an la nei lo.
Union minister-ten Obama thu sawi an helh hi BJP chief minister pakhatin Twitter-a a tar lan atanga intan a ni.
Assam Chief Minister Himanta Biswa Sarma chuan India-ah pawh ‘Hussain Obama tih hmingpui tam tak an awm’ tiin, chung mite chuan enkawlna an mamawh ve tho tih a tar lang a. Hei hi chanchinbumi pakhatin Twitter-ah tho, Obama hi a thil sawiin ‘India pawi a khawih’ nia tar langa thubuai siamsak hial a tar lan a chhan letna a ni.
Obama-a hming pum hi Barack Hussein Obama II a ni.
Eptu politician thenkhat chuan Sarma thil tar lan hian India-a Muslim-te tan hlauhawm a awm tih a tihlanna niin an sawi ve bawk.
Political scientist Ashutosh Varshney chuan Sarma hian Obama hming laita chu tikualin ‘Muslim chhuak tho’ a nihna lantir nana a hman a nih thu leh president hlui hi Islam anga engmah a tih ngai loh thu Washington Post hnenah a sawi.
Inhnialna a awm hnua Indian Express chanchinbuin an kawmnaah Sarma hian a thu tar lanah chuan a la ding reng tih a sawi bawk.