Carlos Alcaraz chu Queen’s Club Championships final-ah hnehna changin a champion a. World number one-ah kir lehin thla thar Wimbledon khelh hunah seeded number one a ni dawn chiang.
Pathianni a Queen’s Club final-ah hian set hmasa berah harsatna tawkin kheltha hran lo mahse Alex De Minaur 6-4, 6-4 in a hneh.
Kuminah inelna a a champion tum nga na a ni a. ATP Tour a inelnaah vawi 11 a champion-na a ni bawk a. Tun tum hi grass court inelna a a champion hmasak ber a ni.
Kum 20 mi hian Novak Djokovic chu world rankings-ah a khum a. US Open champion hi kumin Wimbledon-ah Djokovic el ber tura ngaih a ni.
Nikum inelna lamah Alcaraz hi round li naah Jannik Sinner lakah a tlawm thung.
“No.1 ka nih avangin thil a danglam thui phah vak dawn lo. Novak hian Wimbledon a khel ve dawn a, rinkai ber chu a ni dawn. Tunah hian inrintawkna lian tak ka nei mek a, chuvangin keipawh ka phur ve hle.” tiin Alcaraz chuan a sawi.
“Wimbledon tan hma a world number one a kir hian phurna min pe a, inrintawkna pawh a siam. Mahse danglamna erawh a thui phah chiam lo.” a ti.
Queen’s Club hi Alcaraz-a’n grass court tournament a khel vawi thumna chauh a ni.