California-a khawpui chhunga tlan chi rel intawh khawmna laiah mi pakhatin silaiin mi pariat lai a kap hlum.
Inkahna hi San Jose-a Santa Clara Valley Transportation Authority rail yard-a Nilainia thleng a ni.
Thuneitute chuan thi zingah hian a thawk lai leh silai hmet puaktu nia an rin, he hmuna hna lo thawk tawh thin tho chu an tel niin an sawi.
Inkahna hi an ram sanaa zinga dar 6:45 (India-a zan dar 8:15) vela thleng niin transit thuneitute chuan an sawi a. A bul velah hian puak thei dang a awm em tih thuneituten an en fiah zui nghal.
San Jose Mayor Sam Liccardo chuan an khawpui tana ni lungchhiatthlak a nihthu a sawi a. “He khawpuiah hetiang a thlen nawn tawh lohna tura hma lak chu ka ngaihtuahna luahtu ber a ni,” a ti bawk.
Hliam tuar pakhat chu damdawi in an panpui laiin a thi tih mayor hian a sawi bawk.
United States-ah hian kumin chhungin tuna mi ang chi, inpawngkahna hi vawi 230 a thleng tawh niin Gun Violence Archive chuan a sawi.
Inpawngkahna (mass shooting) an tih a ruala mi pali leh a aia tam kah hlum sawina atan an hmang.