Tunhma khan kan thenawm state hrang hranga MLA thlanah candidate ten sum an sen tamzia kan sawi thin a. Kan ram inthlana a seng tam pawlin nuai 50/60 te an sen lai khan kan thenawm state te ah chuan vaibelchhe 5/6 vel an seng tawh an ti thin. Mak tiin kan sawi a, kan rama chutiang a thlen ve kan hlau em em thin anih kha. Chutiang chu a thlen ve loh nan kohhran, NGO leh a dang dangin hma an la a. Thuziak miten an ziak nasa thin bawk. Inthlan kalta 2018 khan senso a san thu a ri nasa a. Senso tam zualna bik bial hi a la awm cheu bawk.
Fihlim hlei thei bik lo mah ila sum senso ah state dang aia kan ziaawm thin laiin tun kum inthlan erawh a huphurhawm hle niin titi a awm a. A bik takin Mizoram khawthlang lamah suma innekna a nasa hle dawn nia sawi a ni a. Hmanni lawk khan MPF chuan party pakhat candidate chu an han khak nghal pang a. ‘Khak ngaia ka awm hi a zia lo hle mai’ tih aiin MPF lam thiam lohna chu social media hrang hrangah a pawl puiten an la tarlang a. A zahthlakin a pawi thin khawp mai.
Tlin duh vekin inthlan an chuh chu a ni ngei mai. Thiam ang tawk pawhin an bei vek tur pawh a ni. Amaherawhchu midang tih ve theih loh ka han ti teh ang tia cheng vaibelchhe 5 ka sen chuan ka tling zo ang tih thawmte a ri zeuh zeuh mai te hi a va lungchhiatthlak em. Senso tur neih ve loh chuan tel ve lo mai teh ang, kan ram hi hmangaihin bial mipuite an khawngaihthlak pawh ti viau mah ila, hetiang boruak karah chuan sum nei tlem chu tlin ngaihna a awm lovang.
Tin, sum hmanga vote khawn thin, zak hauh lote an pawng chho mek zel a. Chutiang boruak karah chuan kan ram hma lam hi ngaihtuah a va na em. Dik lo taka sum hmanga mi an inlei tlin tlat zel si laia nei ve lo nih avanga tlak ringawt ai chuan rilru chhia pawh put mai a awl viau bawk ang. Dik lo taka titute chu awt hek suh tihte chu a thu in hre mah ila a taka zawm a har thin a. Kan inthlanna thianghlm kan tih thinte hi a thianghlim lo chho ve zo ang tih pawh a hlauhawm ta hle mai. India ram hmun tam tak inthlannaah buaina, tualthihna te a thlen thin chhan tam ber chu sum hmanga inlei hi a ni a. Sum hmanga intihtlin tum te, a leh lamin tluk si lote karah buaina a chhuak a. Tualthihna tam tak a thleng thin tawh.
Mi ram ang boruaka kan luh loh nan, inthlanna felfai kan neih zel theih nan, mitinin mawh kan phur tih hria in sum hmang tam ngamte hi hnawl ngam ila. A hausa tih vel hi i sawi ri fo lo teh ang u. Kristian rama tih awm leh awm loh hi thliar ila, sum hmanga campaign chingte chu ram hmelmaah puang ngam ang u. Chu chu Pathian leh kan ram tan tih dikna tak chu a ni. Kan thusawi leh kan chet dan hi inmil sela, Pathian zarah kan ram inthlanna hi bawlhhlawh kai lutuk lovin a la kal thei a. Amaherawhchu, mipuiten kan tih tur kan tih erawh a ngai tih hria ang u.