Union Minister for Road Transport, Highways leh MSMEs Nitin Gadkari chuan nimin khan Tripura-a National Highway sialna tur lungphum pakua a phum a. He kawng sial tur hi km 262 dawn niin Rs Vbc 2,752 senna tur a ni.
Lungphum phumnaah hian Chief Minister Biplab Kumar Deb leh Union MoS pahnih, Dr Jitendra Singh leh Gen (Retd) Dr V.K.Singh bakah an state-a MP, MLA leh sorkar mi pawimawhte an awm thung.
Union Minister chuan, “Kum ruk liam ta chhung khan Tripura-ah hia kawngpui lian km 300 dawn siam belh a ni a. Tunah chuan he state-ah hian NH km 850 chuang a kal ta,” a ti.
Tripura-a kawngpui siam nan hian Rs Vbc 8,000 hman a nih tawh thu leh kawng kaltlangna tura ram neite hnenah kum 2015 leh 2020 inkarah Rs Vbc 365 pek a nih thu minister hian a sawi bawk.
NH siam belh leh siam chuan district leh khawpui lian zawng zawng a pawh thei dawn tih a sawi.
“Project lian tak pahnih, Feni Bridge leh Udaipur-Agartala kawngpui zawh tep a ni a. Lirthei pahnih a ruala tlan theihna, km 49-a thui, Udaipur-Agartala kawng hi Rs Vbc 750 senna niin thla tharah zawh a ni dawn a. Km 1.8-a tui Feni Bridge, India-a Sabrum leh Bangladesh-a Ramgarh pawhna, Rs Vbc 129 senna pawh December-ah zawh a ni dawn a. He lei hi sumdawnna, ram venna leh thil dangah pawh a tangkai hle dawn a ni,” a ti.
Sabrum leh Chittagong inkar hi km 75 niin lei kân hian a hnai hle tawh dawn a ni.