Mizoram Dance Sports & Movement Championship chu vawiin ni 27 June hian Dawrpui Multipurpose Hall ah ṭan a ni dawn ta.
Mizo Dance Camp leh Mizoram State Sports Council buatsaih niin, Mizoram Rural Bank chu main sponsor an ni a, vawiin hian Jump Rope leh Aerobics prelims neih a ni ang.
He event hnuaia intihsiakna ṭhenkhat chu Online hmanga ṭan a lo ni tawh a, a main event hi ni 4 chhung awh tur niin, Zirtawpni, June 30 zan hian Grand Finale neih a ni ang. A hmunah a duh apiang tan en theih a ni a, TV leh Youtube lamah Live a pek chhuah a ni bawk ang.
Aerobics
Aerobics hnuaiah hian Group leh Solo a intihsiak tur ani a, Group a tel tur hriat tawh zingah hian HBC Cheerleaders leh GAC Cheerleaders te an tel a, intihsiakna a sang chho hle tura ngaih a ni. A hmunah pawh la in ziah luh theih a ni a. Fitness aerobics, gymnastic aerobics leh acrobatic movements te pawh a leng vek a ni.
Aerobics endik tur hian Mizo zinga fitness leh aerobics instructor rual, an mahni a studio neih ṭhah an ṭhu dawn a. Chungte chu Nutei Pautu (Fit In Dance Studio), Misty Hruaii (Lay Up Fitness Studio) leh Esther Chhakchhuak (Fifi Fitness Studio) te an ni.
Jump Rope
Jump Rope ah a tel tur inziak lut tawh te hi tunlai Mizo ṭhalai zinga a thiam tak tak te an ni hlawm a. Freestyle niin, mipa leh hmeichhia a hrana intihsiak tur a ni ang. Endik tur hian Samuel Liansanga a ṭhu dawn a, a ni hi Badass brand nei tu, a jump rope skills avanga India ram chhung leh pawn thlenga hriat lar a ni.
Vawiin hian Final a lut turte thlan chhuah an ni dawn a. Naktuk Nilaini chawhma dar 11 hian Hei Raw Dance Competition Semi Finals neih a ni thung dawm. Tin, ningani hian Showdown dance battle neih a ni bawk ang.
Heng event hrang hranga Final Round te leh MDC Team leh Judge te showcase chu zirtawp zan hian dar 7:00 hian neih a ni ang.