Indian wrestler langsar tak takte chuan an pawl president-in hmeichhiat mipatna lam hawiin a tibuai thin nia an puhna chu khawlaia lungawi lohna lantir ang chi ni tawh lovin, court-ah an kalpui tawh zawk dawn.
Olympic medallist leh Indian wrestling champion eng emaw zat hian New Delhi-ah hun rei tak chhung an pawl hotu, Brij Bhushan Sharan Singh-a chu hmeichhe infiammite lakah mawi lo taka a che nia puhin a laka lungawi lohna lantirin khawlaiah an lo thu tawh.
Kum 66 mi, Singh-a hi India-a rorel lai, BJP MP langsar tak a ni a. Police chuan June 15 khan mipat hmeichhiatna rawngkaia a chetna avangin thubuai an siamsak a, amah erawh chuan a pha thung.
“Wrestler-te hian dikna hlen chhuak turin khawlaiah ni lovin, court-ah an chhunzawm ang,” tiin wrestler pathumin an sawi a. An zingah hian world championship bronze medallist Vinesh Phogat leh Olympic bronze medallist Sakshi Malik te pawh an tel a, Pathianni khan social media-ah a huhovin thuchhuah an siam chu an tar lang.
Wrestling hi India hmar lamah a lar hle a, May thlaa an thil phut nawra parliament building thar pana kawng an zawh lai man an nih pawhin social media-ah an thlalak leh video a darh nasa hle.
Sorkar chuan Singh-a hi Wrestling Federation of India (WFI)-ah inhnamhnawih rih tawh lo turin an ti a, July thla hian inthlan neih tum a ni.
The Times of India-in a tar lan dan chuan wrestler-te hian sorkarin Singh-a laka thubuai siam tura an intiamna chu an titlawhtling niin an sawi.
“WFI kal dan siam that te, inthlan dan kalphung te pawh, an tiam angin tih mek zel a ni,” tiin wrestler-te hian thuchhuah intawm an siamah hian an tar lang niin a sawi.
Singh-a hi India hmar lam, Uttar Pradesh atanga a vawi ruk nana BJP MP atana thlan tlin niin wrestling federation hi kum 10 chuang zet a lo kaihruai tawh bawk.
Politician thiltithei tak hian an puhna hi a pha nasa hle a, amah ‘phiarna’ leh parliament atanga ‘paih chhuah’ an tumna mai niin a sawi.